Државниот обвинител Љубомир Јовески во интервју за телевизија Телма зборува за работата на обвинителствата, истрагите преземени од СЈО, како и за предметите поврзани со прекршувањето на мерките против ковид-19.
На прашањето до каде се постапките за прекршувањата на законските прописи во случаи како во организирањето на верскиот собир во Струга и постапувањето на ексдиректорката на кожната клиника во Скопје, Нина Цаца Билјановска која после патување во Италија со денови одеше на работа, Јовески вели дека истрагите се во тек.
„Се уште обвинителствата прибираат податоци и неопходни докази за да можат да донесат соодветна јавнообвинителска одлука во овие предмети“,
вели Јовески.
Јовески вели дека мал е бројот на казнените налози за граѓаните кои се со правосилна пресуда, бидејќи голем дел од нив поднесуваат приговори.
„Познато е дека судовите ги уважуваат предлозите на јавните обвинители во делот на глобите и паричните казни, но во овој момент не можеме целосно да ја согледаме состојбата колку од нив се правосилни и веројатно тоа е мал број затоа што обвинетите можат да поднесат приговори по кои потоа треба да се спроведе редовна псотапка и уверен сум дека поголем број од обвинетите ќе поднесат приговори “,
вели Јовески.
Во интервјуто тој зборува и за преземените истраги од СЈО, за кои уверува дека активно се работи, иако некои дејствија вели биле во застој поради пандемијата на ковид-19.
По завршувањето на вонредната состојба, Јовески најави и дека ќе почнат со работа четирите истражни центри – во основно обвинителство во Скопје и обвинителството за организиран криминал и во обвинителствата во Куманово и Тетово.