Претходно, Кривичниот суд определи затворски притвор за тринаесетмина, а куќен притвор за еден од осомничените лица во случајот „Синџир“. За преостанатите 12 осомничени, Судот определи други мерки на претпазливост
Првоосомничениот во предметот „Синџир“ кој беше недостапен на органите на прогонот, е обезбеден и изведен пред судија на претходна постапка при Основниот кривичен суд Скопје. Прифаќајќи го предлогот на предметниот обвинител со решение судијата му определи мерка притвор во траење од 30 дена, соопшти Јавното обвинителство (ЈО).
„Според наводите содржани во диспозитивит на наредбата за спроведување на истражна постапка, осомничениот е еден од тројцата организатори на злосторничкото здружение“,
се наведува во соопштението на ЈО.
Претходно, Кривичниот суд определи затворски притвор за тринаесетмина, а куќен притвор за еден од осомничените лица во случајот „Синџир“. За преостанатите 12 осомничени, Судот определи други мерки на претпазливост.
Во случајот „Синџир“ се опфатени вкупно 26 физички и 28 правни лица осомничени за злосторничко здружување, даночно затајување и перење пари и други приноси. Според ОЈО ГОКК, осомничените не пресметале и не платиле данок во вкупен износ од 490 808 618 денари или 7 980 627 евра.
Во образложението за случајот, од Обвинителството велат дека од прибраниот доказен материјал постои основано сомневање дека три лица како организатори заедно со уште други три лица, во текот на 2019 година во Неготино создале група што имала за цел вршење кривични дела даночно затајување и перење пари и други приноси од казниво дело. Припадници на групата, истата 2019 година, станале уште седуммина од осомничените, а наредната 2020 година на оваа група ѝ се приклучиле 11 нови припадници. Во 2021 година членови на групата станале уште тројца сопственици и управители на правни лица.
Тие, како што информираат од Обвинителството, се осомничени дека основале или преземале други фирми, преку кои изготвувале лажни фактури за да избегнат плаќање данок.