„Локацијата ќе биде детално прегледана за да се обезбедат сите докази неопходни за утврдување на причините за настанување на пожарот. Стручно вешто лице ќе се произнесе дали пожарот е евентуално предизвикан од човечки фактор или се работи за несреќен случај“, велат од Обвинителството
Увидни екипи со јавен обвинител од Основното јавно обвинителство Скопје денеска го започнаа увидот на објектот на Универзалната сала, каде вчера изби пожар, соопштија денеска од Обвинителството.
Оттаму велат дека локацијата е обезбедена и се создадени неопходни услови за извршување на увид од страна на јавен обвинител.
„Локацијата ќе биде детално прегледана за да се обезбедат сите докази неопходни за утврдување на причините за настанување на пожарот. Стручно вешто лице ќе се произнесе дали пожарот е евентуално предизвикан од човечки фактор или се работи за несреќен случај“,
се вели во соопштението од Обвинителството.
Во текот на вчерашниот ден, како што велат од Обвинителството, во рамките на своите надлежности, Државниот инспекторат за труд извршил контрола на работењето на фирмите ангажирани за реконструкција на објектот и изготви записник.
„Бидејќи се уште трае фазата на прибирање докази, односно до овој момент не е утврдено дали пожарот настанал како последица на човечки фактор, вчера во полициска станица беа земени изјави од три задржани лица, по што тие беа пуштени со оглед на тоа што во оваа фаза нема основ за нивно натамошно задржување“,
велат од Обвинителството.
Вчера, некаде по 9 часот избувна пожар во Универзалната сала во Скопје. Откако пожарникарски екипи интервенираа, беше локализиран два часа по избувнувањето.
Поради отежнатиот пристап кон објектот, пламените јазици ги гаснеа пожарникари со помош на кран. Како што објави ЦУК, гореше една од куполите на Универзалната сала.
Командирот на скопската противпожарна бригада Звонко Томески во изјава за медиумите рече дека причините за избувнувањето на пожарот во Универзалната сала сè уште не се познати, а нив дополнително ќе ги утврдат полициските екипи. Во гаснењето на пожарот учествувале вкупно 24 пожарникари со девет противпожарни возила.
МВР соопшти дека тројца градежни работници се приведени, кои во моментот на пожарот извршувале работни задачи во објектот на Универзалната сала.
Поради вдишување чад од пожарот две жени со возило на Итната медицинска помош биле однесени на Клиниката за токсикологија.
Поврзани вести:
- (ВИДЕО) Голем пожар во Универзална: Пристапот на пожарникарите отежнат од лимените огради и паркираните возила
- (ВИДЕО) Почна гасењето на пожарот во Универзалната сала
- (ВИДЕО) Поранешниот директор на Универзалната сала: Жално, објектот требаше да се реконструира уште пред 30 години
- (ВИДЕО) Локализиран пожарот во Универзалната сала
- Арсовска: Две години јавно зборуваме дека проектот за Универзалната сала е погрешен и небезбеден, МВР да ги истражи причините за пожарот
- Гореше старата конструкција во Универзална, вели сопственикот на фирмата што ја реконструира
- (ВИДЕО) Во пожарот нема повредени и жртви, предизвикана е само материјалната штета, вели Костадиновска-Стојчевска
- Засега не се знаат причините за пожарот во Универзална, дополнително ќе ги утврдува полицијата, вели командирот на скопската пожарна
- Приведени тројца градежни работници кои за време на пожарот биле во Универзалната сала
- Две жени пренесени на Токсикологија – излегле на балкон и вдишале чад од пожарот во Универзалната сала