Министерката за образование изјави дека ги поддржува студентите од Универзитетот „Св. Кирил и Методиј“, чие претставничко тело Универзитетското студентско собрание им испрати ултиматум на ЈСП „Скопје“ и на скопската градоначалничка Данела Арсовска дека ако до крајот на денешниот ден не ги вратат во нормала автобуските линии, ќе излезат на протестот најавен за утре
Срамота е во главниот град на Македонија да им се оневозможи правото на учениците да добијат соодветно образование што е загарантирано право со Уставот, изјави денеска министерката за образование и наука Весна Јаневска коментирајќи ја состојбата со јавниот градски превоз, кој од вчера попладне е драстично редуциран поради недостиг на гориво за автобусите.
Поради ваквата ситуација дел од учениците денеска доцнеа на училиште, па во тој контекст прашана дали овие изостаноци ќе се водат како неоправдани, Јаневска рече дека анализата на Министерството на електронскиот дневник покажала дека нема значајна разлика во неоправданите изостаноци во овој период во споредба со истиот период минатата година.
„Претпоставувам дека учениците и родителите прават најдобро што можат, односно се организираат за нивните деца да стигнат на училиште, но и наставниците имаат разбирање за ова што се случува“,
рече министерката, одговарајќи на новинарски прашање пред настанот за потпишувањето на Анексот на меморандумот за соработка меѓу Министерството за образование и наука (МОН) и Амбасадата на Франција во земјава.
Јаневска состојбата со јавниот превоз ја оцени како многу лоша и изрази надеж дека градските власти сериозно ќе ја сфатат оваа ситуација и ги повика под итно најдат соодветно решение.
„Искрено се надевам дека ќе се изнајде решение за оваа ситуација, затоа што е недозволиво сите напори кои ги правиме, промените кои се обидуваме да ги спроведеме за подобрување на квалитетот на образованието да бидат на некој начин спречувани заради неорганизираност на градските власти“,
изјави министерката.
Таа рече дека ги поддржува студентите од Универзитетот „Св. Кирил и Методиј“, чие претставничко тело Универзитетското студентско собрание им испрати ултиматум на ЈСП „Скопје“ и на скопската градоначалничка Данела Арсовска дека ако до крајот на денешниот ден не ги вратат во нормала автобуските линии, ќе излезат на протестот најавен за утре.
„Апсолутно се во право, тие имаат право својот револт на било каков начин, се разбира, соодветен, да го изразат, и ако ова е единствениот начин да најдат решение за нивниот проблем, јас ги поддржувам“,
изјави Јаневска.
Откако меѓу средношколците почнаа да кружат информации дека ќе нема настава бидејќи нема автобуси, директорите на скопските средни училишта што ги исконтакира „360 степени“ велат дека училиштата ќе имаат редовна настава без оглед на ситуацијата со редуцираниот автобуски превоз.
Директорите се согласни дека не добиле никакви насоки од Министерството за образование и наука (МОН). Според нив, за евентуални промени во наставата, одлука може да донесе само Владата.
Скопјани утрово мораа да се снаоѓаат за да стасаат до своите работни места, поради вчерашните најави на синдикатите при ЈСП „Скопје“ дека јавниот градски превоз во главниот град ќе се одвива со драстично редуциран број на автобуси, поради недостиг на гориво.
Од синдикатите на Јавното сообраќајно претпријатие „Скопје“, во изјави за медиумите вчера информираа дека во Скопје сообраќаат само 25 автобуси, а останатите се паркирани во автобазите на Јавното сообраќајно претпријатие „Скопје“ во Автокоманда и во Ѓорче Петров.
Денеска во 18 часот Советот на Град Скопје ќе одржи итна вонредна седница поради состојбата со јавниот градски превоз. Седницата ја свика претседателот на Советот, Трајко Славески.
Во решавање на проблемот со јавниот превоз ќе се вклучи и Владата, која, како што дознава „360 степени“ од владини извори, денеска во 14 часот ќе одржи итна владина седница за надминување на состојбата во Градот Скопје со недостигот на гориво за Јавното сообраќајно претпријатие (ЈСП).
На седницата, велат нашите извори, ќе се расправа за позајмување гориво од нафтените државни резерви кои ќе се доделат на Градот Скопје сè до надминување на проблемот со набавката на нафта за градот и ЈСП.