Министерката посочи дека високото образование е меѓу главните приоритети на МОН и дека веќе се преземаат конкретни чекори за усогласување со европските стандарди и пазарот на труд. Во таа насока, направена е евалуација на дел од постоечките и се акредитирани повеќе нови студиски програми
Со првиот академски час на Универзитетот „Св. Кирил и Методиј“ (УКИМ) во Скопје денеска беше означен почетокот на новата академска година. Министерката за образование и наука Весна Јаневска им посака добредојде на новите студенти, порачувајќи им да бидат љубопитни и храбри во потрагата по знаења.
„На ова плато се наоѓа најголемиот потенцијал што го има Македонија. Вие сте идните професионалци, иноватори и лидери кои ќе ја градат иднината на оваа држава“,
истакна Јаневска, повикувајќи ги студентите максимално да ги искористат можностите за истражувања, меѓународни размени и проекти.
Министерката посочи дека високото образование е меѓу главните приоритети на МОН и дека веќе се преземаат конкретни чекори за усогласување со европските стандарди и пазарот на труд. Во таа насока, направена е евалуација на дел од постоечките и се акредитирани повеќе нови студиски програми.
„Овие млади луѓе избрале високо образование за да ги остварат своите амбиции и да се подготват за идните професионални и животни предизвици. Очекуваат да стекнат знаење и да научат вештини што ќе им овозможат успешно да се вклучат во светот на брзите технолошки, економски и општествени промени. Универзитетот ’Св. Кирил и Методиј’ е вистинското место за учење, поставува прашања и истражување. Бидете љубопитни студенти и храбри во потрагата по нови знаења“,
рече таа.
Во однос на студентскиот стандард и условите за престој, Јаневска информира дека веќе се реконструирани два студентски домови во Скопје од кои едниот вчера беше пуштен, а наскоро се очекува отворање и на „Кузман Јосифовски-Питу“, по што следи реконструкција и на останатите домови низ државата.
Јаневска рече дека наскоро ќе биде објавен конкурсот за студентски стипендии, во кој се воведуваат нови категории – меѓу кои и за поддршка на студенти со ретки болести и посебни образовни потреби.
Министерката исто така ја нагласи соработката со студентските асоцијации, истакнувајќи дека досега лично прифатила и исполнила десетина нивни барања за подобрување на студентскиот живот.
Инаку, со конкурсот на УКИМ, годинава на 23 факултети во состав на универзитетот беа слободни вкупно 8 851 место за бруцоши во новата академска година.
На најстариот и најголем универзитет во државата во моментов студираат над 26 илјади студенти, од кои на додипломски студии се повеќе од 23 400, а другите се на магистерски и на докторски студии.
Во првиот циклус (додипломски) студии на УКИМ има 242 студиски програми, 313 на вториот (магистерски) и 99 на третиот циклус (докторски) студии.