Пратениците на Комисијата за прашања на изборите и именувањата го одбија барањето на поранешната специјална јавна обвинителка Катица Јанева за остварување право на плата по престанок на функцијата.
Ваквата одлука беше донесена едногласно од пратениците кои се членови на Комисијата. Тие изразија згрозеност од, како што рекоа, дрскоста на Јанева да побара апанажа и покрај тоа што против неа се води судски процес за злоупотреба на функцијата.
„Можеби Јанева има законско право за апанажа, но треба да има образ, чест и морал дали треба да го побара ова. Зборувам од морален аспект“,
рече пратеничката на ВМРО-ДПМНЕ, Даниела Рангелова, според која Јанева не заслужува да добие апанажа.
Независната пратеничка Ивана Туфегчиќ го осуди барањето на Јанева поради тоа што обвинението против неа покажува дека ја изневерила довербата на јавноста.
„Нејзината дрскост да побара апанажа мене ми укажува дека во оваа држава имаме проблем со вредносниот систем“,
рече Туфегчуќ додавајќи дека сепак Јанева има право на пресумпција на невиност сè додека не се докаже нејзината вина.
Претседателот на Комисијата Илија Димовски образложи дека Собранието не може да ѝ додели апанажа на Јанева бидејќи не ги исполнува условите. Според Димовски, Јанева не е именувана од Собранието, кое само учествува како предлагач во нејзиниот избор, туку била именувана од Советот за јавни обвинители и, според него, сите права и обврски на Јанева се кон Советот на јавни обвинители.