Јанакиески во судските процеси во кои е обвинет досега во неколку наврати алудираше дека е еден од најприслушуваните и за него има над 80 000 разговори и над 100 000 СМС-пораки
Ексминистерот од ВМРО-ДПМНЕ, Миле Јанакиески, имал емотивно страдање од прислушувањето.
Тоа тој го навел во барањето да биде ставен во листата на жртви, односно оштетени во судскиот процес „Таргет-Тврдина“, кој се однесува на незаконското масовно прислушување.
Барањето утрово го прочита судијката Џенета Бектовиќ, на почетокот на судското рочиште за овој предмет.
Во него, Јанакиески наведува дека бара од обвинителите да го стават на листата оштетени поради тоа што има емотивно страдање, односно загрозување и нарушување на неговите права како последица на сторено кривично дело со прислушувањето.
Јанакиески во судските процеси во кои е обвинет досега во неколку наврати алудираше дека е еден од најприслушуваните и за него има над 80 000 разговори и над 100 000 СМС-пораки.
Претходно, и ексминистерката Гордана Јанкулоска официјално побара да биде ставена на листата оштетени. Таа е и обвинета токму во овој предмет, заедно со бившиот директор на УБК, Сашо Мијалков, и други вработени во Управата.
Инаку, Јанкулоска утрово беше спроведена од затворот „Идризово“ каде што влезе пред два дена да ја извршува затворската казна од 4 години за случајот „Тенк“.
Во судницата денеска до неа седи сопругот Влатко Илиевски, кој по професија е адвокат и за кого денеска беше соопштено дека ќе се приклучи во тимот на нејзини бранители.