Не е проблемот да се постигне цензус, додаде тој, односно не е точно дека граѓаните нема да излезат на гласање, како што вели Мицкоски, туку „Мицкоски и ВМРО-ДПМНЕ повторно сакаат да блокираат“
Градоначалникот на Општина Карпош и лидер на партијата ГРОМ, Стевчо Јакимовски, размислува да се кандидира за претседател. Тој во своето гостување во „Студио 10“ на ТВ 24 посочи дека досега не разговарал со политички фактори, но од граѓаните добивал поддршка за претседателска кандидатура.
„Да се биде на одредена функција треба да се има многу искуство. Политичкото искуство е многу битно, а ние немаме политичар кој има доволно долго политичко искуство за една таква позиција. Во Хрватска сите претседатели биле избирани според големото политичко искуство“,
рече Јакимовски.
Јакимовски го колеба дали ќе има промена на изборниот модел, цензусот, финансирањето и собирањето потписи.
„Оние кои пропагираат претседател да се избира во Собранието, а не на непосредни избори, прават калкулации да се избира претседател Албанец. Јас се залагам за претседателски систем. Мислам дека претседателот треба да има повеќе и поголеми ингеренции. Претседателот треба да има поголемо влијание и во судската власт оти него го бираат сите граѓани. Тоа е и причината што треба да биде неутрален, но и да има повеќе ингеренции и подолг мандат“,
рече лидерот на ГРОМ.
Во однос на парламентарните избори, како што посочи Јакимовски, ГРОМ ќе настапи самостојно и ќе има листи во сите шест изборни единици.
„Мицкоски во декември 2021 години ми рече дека ќе има предвремени избори. Гледаме дека избори нема. Треба да се оди на редовни избори и треба да се оди на Пржинска влада за да се отстранат сите аномалии што ги направила власта во меѓувреме. На тој начин изборите ќе бидат покредибилни и ќе имаме мирен премин на власта. Изговор е дека се бара заштеда со тоа што ќе се оди истовремено на претседателски и парламентарни избори оти голема е веројатноста дека кандидат на ВМРО-ДПМНЕ за претседател нема да помине“,
посочи Јакимовски.
Според него, претседателот на мора да биде од редот на некоја од големите политички партии.
„Народот нека ја анализира кампањата и нека одлучи кој треба да му ја води државата. Ако се згужваат сите избори наеднаш, луѓето ќе се збунат од толку реклами, кампањи и слично“,
посочи Јакимовски.
Не е проблемот да се постигне цензус, додаде тој, односно не е точно дека граѓаните нема да излезат на гласање, како што вели Мицкоски, туку „Мицкоски и ВМРО-ДПМНЕ повторно сакаат да блокираат“.
„Цензусот од 40 отсто не е превисок оти ние секогаш сме имале над 50 отсто излезност. Ние во 2001 година видовме колку е битен претседателот. Борис Трајковски тогаш перфектно ја одигра играта. Ние тогаш го потценивме Трајковски, но тој добро одигра во една тешка ситуација“,
рече лидерот на ГРОМ и актуелен градоначалник на Општина Карпош.
Досега своја кандидатура за претседателските избори официјално најави универзитетскиот професор и инфектолог Вело Марковски.