Во објавата на својот фејсбук-профил во која информира за собраните потписи, кандидатот на ГРОМ, Стевчо Јакимовски, порача дека на државата ѝ е потребен храбар и искусен политичар кој знае како да го врати значењето на претседателската функција и додава оти првата цел му е влез во вториот круг од претседателските избори
Претседателскиот кандидат на Граѓанската опција за Македонија (ГРОМ), Стевчо Јакимовски, кој е актуелен претседател на овој политички субјект и градоначалник на Општина Карпош, вечерва во објава на социјалните мрежи соопшти дека ги собрал потребните 10 илјади потписи за формален влез во трката за шеф на државата.
Во објавата на својот фејсбук-профил во која информира за собраните потписи, Јакимовски порача дека на државата ѝ е потребен храбар и искусен политичар кој знае како да го врати значењето на претседателската функција и додава оти првата цел му е влез во вториот круг од претседателските избори.
„Потписите се собрани, битката допрва почнува. Кога не сум фаворит обично сум најсилен, а првата цел е влез во вториот круг. На Република Македонија ѝ треба храбар претседател, а не марионета. Македонија заслужува искусен политичар кој знае како да го врати значењето на функцијата Претседател на Македонија. Секој од нас заслужува подобро. Храбро до победа. Да живее Македонија“,
пишува Јакимовски во објавата на Фејсбук.
Јакимовски објави дека успеал да собере 10 372 граѓански потписи за својата претседателска кандидатура.
Ажурираниот број на собрани потписи до вечерва до 20 часот за сите кандидати, вклучувајќи го и кандидатот на ГРОМ, се очекува да биде објавен утре наутро од страна на Државната изборна комисија (ДИК).
Досега тројца од вкупно единаесеттемина кандидати кои собираат 10 илјади граѓански потписи успеаја да си обезбедат место во трката за шеф на државата. Прв тоа го стори кандидатот на ДУИ, Бујар Османи, по него Арбен Таравари, кој е претседателски кандидат на опозициските партии на Албанците, а дека успеал да собере 10 илјади потписи последно објави кандидатот на Движењето За наша Македонија (ЗНАМ), Максим Димитриевски.
- Османи од домашна атмосфера информира дека се собрани 10 000 потписи за неговата кандидатура за шеф на државата
- По Османи, и Таравари објави дека ги собрал потребните 10 илјади потписи за влез во претседателската трка
- Максим Димитриевски е третиот кандидат кој обезбеди 10 илјади потписи за влез во трката за шеф на државата