Министерот Калц своите барања ги заснова на неодамнешната изјава на турскиот претседател Реџеп Таип Ердоган дека Турција би можела да влезе во Израел за да им помогне на Палестинците
По заканите на Ердоган дека не е исклучена можноста Турција да влезе во Израел за да им помогне на Палестинците, израелскиот министер за надворешни работи Израел Кац побара од НАТО да ја исклучи Турција од своите редови бидејќи, како што изјави, неговата опасна реторика ги прекршила принципите на безбедносната алијанса.
„Израел ќе разговара со сите НАТО-членки и ќе ги повикаме да ја осудат Турција, но и да ја исклучат од Алијансата“,
рече Кац.
Тој претходно му порача на Ердоган дека ги следи стапките на Садам Хусеин и дека треба да се сети што се случи во тој случај.
Претходно, турскиот претседател Ердоган индиректно се закани на Израел со воена интервенција за да им помогне на Палестинците. Тој кажа дека ќе влезат во Израел исто како што влегле во Нагорно Карабах и во Либија.
„Мораме да бидеме многу силни за Израел да не може во Палестина да го направи тоа што го прави сега. Како што влеговме во Карабах и во Либија, можеме да направиме нешто слично и таму“,
рече турскиот претседател на митингот на владејачката партија АКП во црноморскиот град Ризе.
Турскиот претседател не прецизира за каква интервенција станува збор, а претставниците на неговата партија не одговорија за деталите од неговата изјава.
Во 2020 година Анкара испрати војници и воена опрема во Либија за да ја поддржи либиската влада на национално единство и нејзиниот лидер Абдулхамид ал Дбеибах.
Во неделата, холандскиот ултрадесничар Герт Вилдерс, чија партија победи на неодамнешните избори во Холандија, го нарече Ердоган „исламофашист“ и „целосно луд“ порачувајќи дека Турција треба да биде исклучена од НАТО.
Но и покрај овие повици, воената алијанса нема механизам за суспензија или за отстранување на земји членки, па затоа единствена опција за евентуален излез од НАТО е доколку самата земја доброволно се повлече.