По синоќешниот терористички напад во Ерусалим, во кој загинаа 7 лица а 10 беа повредени откако 21 годишниот напаѓач Алкам Каири отвори оган врз луѓе кои излегувале од Синагога, израелската војска денеска соопшти дека го зголемува бројот на војници во окупираниот Западен Брег каде што живеат претежно Палестинци.
“По проценката на израелските одбранбени сили, одлучено е дивизијата во Јудеја и Самарија на Западниот Брег да се засили со дополнителен баталјон”,
се вели во соопштението.
Вчерашниот инцидент дојде откако ден претходно, израелските сили убија девет Палестинци, вклучително и најмалку еден цивил, за време на воен напад во Џенин, градот на Западниот Брег, кој стана жариште на вооружениот палестински отпор. Во четвртокот вечерта, милитантите во Појасот Газа истрелаа најмалку 13 ракети врз Израел, што предизвика нови стравувања од пошироко насилство.
Инцидентот во Ерусалим наиде на остра осуда од американскиот Стејт Департмент, a го осудија и Европската Унија, Франција, Велика Британија и официјална Москва.