Законот за експропријација е дел од петте закони за кои се предложени измени, и кои се поднесени во Собранието со европско знаменце, а се поврзани со изградбата на коридорите 8 и 10-д од страна на американско-турскиот конзорциум „Бехтел и Енка“. На Комисијата за европски прашања утре ќе се најде и последниот од петте предложени измени на закони поврзани со изградбата на коридорите
Предложените измени за Законот за експропријација денеска го поминаа комисискиот филтер во собраниската Комисија за европски прашања.
Законот за експропријација е дел од петте закони за кои се предложени измени, и кои се поднесени во Собранието со европско знаменце, а се поврзани со изградбата на коридорите 8 и 10-д од страна на американско-турскиот конзорциум „Бехтел и Енка“.
По поминатиот комисиски филтер, Комисијата за европски прашања ќе го проследи предлог-законот на натамошна постапка во Собранието. Пред да дадат зелено светло за предложените измени за Законот за експропријација, членовите на Комисијата за европски прашања ги одбија трите амандмани од опозициската ВМРО-ДПМНЕ по однос на овој закон.
За време на комисиката расправа, пратениците од ВМРО-ДПМНЕ уште еднаш го повторија својот став, односно дека ставањето на пакетот законски измени за изградба на коридорите на оваа Комисија се злоупотребува европското знаменце, зашто, според нив, овие закони немаат никакво усогласување со законодавството на ЕУ.
Во однос на расправата за конкретниот Закон, пратеникот на ВМРО-ДПМНЕ, Миле Лефков, кажа дека со предлог-законот за експропријација „ќе се експроприра приватна сопственост, меѓутоа ќе се експроприраат и градби што немаат целосна документација, односно се бесправно изградени објекти“.
„Со експропријацијата престанува правото на сопственост на физички и правни лица, односно престанува приватната сопственост и престанува правото на сопственост на единиците на локална самоуправа и Градот Скопје. Со законите за урбанистичко планирање и за градење видовме дека како проекти од стратешки интерес беа утврдени само оние за изградба на државни патишта и гасоводи, меѓутоа со промените на Законот за урбанистичко планирање и Законот за градење видовме дека објекти од стратешки интерес можат да бидат и кои било проекти за коишто Владата ќе донесе одлука дека се од стратешки интерес. Се прекршуваат уставните начела за заштита на правото на сопственос“,
рече Лефков.
Министерот за финансии Фатмир Бесими за време на денешната расправа во Комисијата кажа дека се работи за измени на Законот за експропријација, кои не се однесуваат само на проектот за изградбата на коридорите 8 и 10-д, туку ќе важат за сите проекти од јавен интерес и тоа не само за патната инфраструктура. Бесими вели дека содржината на измените е заштита на правата на граѓаните, правата на сопственост и правата за станување.
„Кога се работи за објекти, кои согласно Уставот спаѓаат во јавен интерес, се овозможува и допрецизирање, значи се работи за допрецизирање на правото на граѓаните кое постои во законот. Значи, се работи само за надоместок кога треба да ги ослободат нивните објекти, додека најдат свои објекти во меѓувреме. Само тоа. Не станува збор за експропријација во овие измени, затоа што тие работи се дефинирани во законот. Значи, само допрецизирање со цел да се забрза постапката на терен, а ништо надвор од досегашните законски прописи“,
рече Бесими.
Утре напладне, Комисијата за европски прашања треба да продолжи со петтиот и последен законски предлог од пакетот закони за изградбата на коридорите 8 и 10-д – Предлогот на закон за изменување и дополнување на Законот за утврдување на јавен интерес и номинирање на стратешки партнер за имплементација на проектот за изградба на инфраструктурниот Коридор 8 (делница: Тетово – Гостивар – Букојчани и проектот за автопатот Требеништа – Струга – Ќафасан) и Коридорот 10-д (делница на автопатот Прилеп – Битола) во Република Северна Македонија, по скратена постапка.