Изјавата на Каракачанов е само балканска, во негативна смисла, оцени министерката за одбрана Радмила Шекеринска коментирајќи го нејзиниот бугарски колега кој рече дека вакцините што ќе ги донира Бугарија во земјава не се за соседите туку за нивните сонародници Бугари кои живеат тука.
„Јас претпоставувам дека и неговиот премиер би се засрамил од оваа изјава. Оти таа не е изјава, ниту на сојузништво, ниту на пријателство. Навистина е изјава што е само балканска, ама во онаа негативната смисла. Она што станува јасно е дека многу луѓе сакаат да печалат политички поени кои не значат ништо. Имало луѓе во Бугарија кои печалеле и пари, како што видовме од бугарските пасоши во Северна Македонија, ама во случајов ќе зборуваме за печалењето политички поени, кое сме го виделе и во минатото и кое обично не завршува сјајно. Ама ако на прашање на вакцина и на здравје некој се труди да печали вакви поени тоа повеќе зборува за него, отколку за сите други“,
вели Шекеринска за ТВ Клан Македонија.
Каракачанов претходно на прашање за време на телевизиски настап, зошто Бугарија одлучила да донира вакцини против ковид-19 во Северна Македонија, како причина ги наведе бугарските заедници кои живеат во други држави, што се надвор од ЕУ.
„Тука не станува збор за соседи, туку за сонародници. И не само во Македонија, туку и западните покраини во Украина и Молдавија каде има бугарски заедници. На крајот на краиштата Бугарија е држава на сите Бугари. Ние имаме сонародници кои живеат во државите надвор од ЕУ. Тие се бугарски граѓани. Тие можат и треба да се вакцинираат. Кога ние ги признаваме за Бугари треба да им дадеме можност да им се помогне, се разбира ако сакаат, тоа е доброволно“,
рече Каракачанов.