За предложената листа, според информации од партијата, гласале 668 делегати, а шест биле против
Новиот состав на Централниот одбор на владејачкиот СДСМ е избран предмалку, на 26.конгрес на партијата, кој се одржува онлајн. За предложената листа, според информации од партијата, гласале 668 делегати, а шест биле против.
Избран е и новиот состав на Надзорниот одбор, составен од 9 члена.
Се очекува вечерва новиот ЦО да ја одржи и првата седница, на која ќе бидат избрани членовите на Извршниот одбор, како и новите потпретседатели, најверојатно четворица, како што најавуваат од партијата. Ќе бидат избрани и генерален и организациски секретар на СДСМ.
ЦО го почнува новиот мандат со 120 членови од листата што пред конгресот ја предложија лидерот Зоран Заев и досегашното партиско раководство, согласно со номинациите што дојдоа од општинските конференции на СДСМ.
Сепак, оставена е можност, во наредните четири години, ЦО да биде проширен со уште најмногу десет члена, согласно со промените на Статутот што се носеа денеска, а кои предвидуваат зголемување на бројот на членови на ова тело од 100 до 120 на 110 до 130.
Како што е објавено, две третини од новиот состав на ЦО се нови лица кои не членувале во досегашното партиско раководство, а дел од нив ниту во претходните.
Во првиот дел од конгресот, делегатите на СДСМ ја избраа и Сања Лукаревска за нова заменик-претседателка на партијата, односно на втората функција во партиската хиерархија.