Со ова е комплетиран составот на техничката влада која ќе функционира до изборот на нова, по редовните парламентарни избори закажани за 8 мај.
За утре во 10 часот е најавено и примопредавање на функцијата меѓу досегашниот претседател на Владата, Димитар Ковачевски, и новиот премиер Талат Џафери
По денешниот избор на преодната влада, Собранието на засебна седница ги избра и заменик-министрите, но и дополнителните заменик-министри во новата техничка влада.
Освен заменик-министри во 16 ресори на Владата, Џафери предложи и дополнителни заменик-министри во пет министерства.
Станува збор за министерствата за внатрешни работи, за труд и социјална политика, за финансии, за земјоделство, водостопанство и шумарство и за информатичко општество и администрација, предвидени со Законот за Владата, во делот кој се однесува на составот на преодната влада, која се избира 100 дена пред парламентарни избори.
За дополнителен заменик-министер за внатрешни работи од редовите на СДСМ е избран Митко Бојмацалиев, а дополнителна заменик-министерка во Министерството за труд и социјална политика ќе биде Јованка Тренчевска.
Од редовите на ВМРО-ДПМНЕ, Елена Петрова е именувана за дополнителна заменик-министерка во Министерството за финансии, Стефан Андоновски е назначен за дополнителен заменик-министер во Министерството за информатичко општество и администрација, а Цветан Трипуновски е дополнителен заменик-министер за земјоделство.
Премиерот на техничката влада Талат Џафери рече дека заменик-министрите се истите што биле и досега, а биографиите на целокупниот состав на преодната влада се веќе познати и јавно достапни. Затоа тој само ги наведе имињата и во своето излагање не ги образложуваше засебно предлозите.
„Биографиите на сите се достапни и во интерес на времето нема да ги образложувам сите имиња поединечно“,
кажа Џафери.
Со ова е комплетиран составот на техничката влада која ќе функционира до изборот на нова, по редовните парламентарни избори закажани за 8 мај.
За утре во 10 часот е најавено и примопредавање на функцијата помеѓу досегашниот претседател на Владата, Димитар Ковачевски, и новиот премиер Талат Џафери.