На еден ден пред одлуката за избор на техничка влада, од која зависи одржувањето на предвремените парламентарни избори на 12 април, останува дилемата дали ВМРО-ДПМНЕ ќе предложи нов кандидат за министер за внатрешни работи.
Нивниот предлог, полковникот Драган Ковачки да раководи со овој ресор, не само од СДСМ туку и од голем дел од стручната јавност беше оценет како спорен, со оглед дека станува збор активен офицер, а според членот 97 од Уставот „со органите на државната управа во областа на одбраната и полицијата раководат цивилни лица кои непосредно пред изборот на тие функции биле цивили најмалку три години“.
Од ВМРО-ДПМНЕ посочија дека постојат преседани кои укажуваат дека Уставот бил пренебрегнат, но најавија дека најверојатно денеска ќе ја донесат конечната одлука и ќе решат дали наместо Ковачев ќе дадат друг предлог.
Останатите кандидати на опозицијата се прифатливи за власта. Доколку не се случат политички турбуленции кои би довеле до пролонгирање на целиот процес, според сценариото, премиерот Заев утре ќе треба да поднесе оставка од функцијата.
Откако Собранието ќе ја констатира оставката и со тоа ќе изгласа недоверба за целиот кабинет, претседателот Стево Пендаровски ќе треба да му го даде мандатот за состав на нова влада на идниот премиер, а тоа по предлог на СДСМ ќе биде актуелниот министер за внатрешни работи Оливер Спасовски. Тој треба да го предложи составот на новата влада кој со мнозинство гласови треба да го избере Собранието.
Владата на Спасовски ќе ја води државата 100 дена, до 12 април, кога ќе треба да се одржат предвремените парламентарни избори.
Од актуелните членови на Владата, барем оние предложени од СДСМ, во новиот состав нема да остане единствено вицепремиерот Кочо Анѓушев, кој најави дека ќе се повлече од функцијата. Неговото место ќе го заземе актуелната министерката за труд и социјална политика Мила Царовска која ќе ѝ го отстапи ресорот на кандидатката од ВМРО-ДПМНЕ, Рашела Мизрахи.
Засега нема информации дали ДУИ ќе има ротација на своите кадри во Владата, на истиот начин како што тоа го стори во 2016 година.