Во бугарскиот парламент има 240 места, па за формирање мнозинство се потребни најмалку 121 пратеник. Извесно е дека Борисов со претпоставените 67 до 75 пратеници тешко би можел да формира коалиција, без оглед дали изборниот праг ќе го помине неговиот досегашен партнер, ВМРО-БНД на Красимир Каракачанов
ГЕРБ на Бојко Борисов победи на парламентарните избори во Бугарија, но пред соседната држава претстојат денови на неизвесност и макотрпни разговори за формирање влада, со оглед дека во новиот парламентарен состав влегуваат дури една третина сосема нови пратеници, од партии и движења кои отворено се спротивставуваа на актуелната владејачка гарнитура.
Ова е сумарно исходот од денешниот изборен ден во Бугарија, каде поради комплексноста на ситуацијата, никој не би сакал да го коментира или прогнозира финалниот исход, односно кој се би можел да влезе во коалиција за формирање нова влада. Голем дел од аналитичарите прогнозираат дека, според распоредот на силите, можно е да бидат распишани нови, предвремени избори.
Слични со предвидувањата на бугарските медиуми и аналитичари се и оние на странските медиуми. „Ројтерс“, на пример, прогнозира дека разговорите за формирање влада би биле тешки и би можеле да траат и неколку недели, а ниту тие не исклучуваат нови избори.
Во таа насока е и изјавата на актуелниот премиер, кој предложи формирање експертски кабинет кој би ја водел државата до излезот од пандемијата до декември, датум по кој според тоа што може да се протолкува од неговата изјава, би требало да се оди на ново пребројување на политичките сили.
Пирова победа на ГЕРБ, БСП најголеми лузери, Слави може да слави
„Ние нема да коалицираме со ГЕРБ, БСП, ДПС, ниту со оние на војводата шкембар. Ние, за разлика од нив, не лажеме. Ако нема договор, ќе има нови избори“, изјави заменик претседателот на движењето предводено од шоуменот Слави Трифонов.
Според последните резултати, врз основа на 100 % од паралелното пребројување на гласовите кое го објави агенцијата „Алфа рисирч“, за партијата на Борисов се определиле 25,2 отсто од бугарските бирачи. Овие резултати, според првичните проекции, на ГЕРБ би му обезбедиле 69 пратеници. Доколку конечните резултати не се разликуваат во голема мера со првичните, ова би значело дека ГЕРБ во новиот парламент ќе има значително помалку пратеници. На претходните избори владејачката партија освои 33,5 проценти од гласовите и имаше 95 пратенички мандати.
Во бугарскиот парламент има 240 места, па за формирање мнозинство се потребни најмалку 121 пратеник. Извесно е дека според актуелните бројки, Борисов не би можел да формира коалиција само со досегашниот партнер, ВМРО-БНД на Красимир Каракачанов. Тој во претходниот состав во парламентот, заедно со партијата АТАКА, настапуваше под коалицијата со име Обединети патриоти, и имаше 27 пратеници. Но, по денешното гласање, ВМРО-БНД најверојатно ќе биде „најслабата“ парламентарни партии со освоени 4 проценти од гласовите односно 11 пратеници (според проекциите на „Алфа рисрч“). Меѓутоа, со оглед дека не станува збор за конечни резултати, не е сигурно ни дека ВМРО-БНД ќе успее да влезе во парламентот бидејќи изборниот праг е поставен токму на процентот околу кој се движи нивниот број на освоени гласови.
Но, се чини дека вистинскиот неуспех на овие избори ќе и биде припишан на досега најголема опозициска партија, Бугарската социјалистичка партија предводена од Корнелија Нинова. Таа воопшто не се појави во јавноста откако според проекциите (43 пратеници) стана јасно дека таа и нејзините социјалисти повеќе нема да бидат втората политичка сила, туку таа позиција ќе му ја отстапат на познатиот шоумен Слави Трифонов кој со своето движење „Има таков народ“ во парламентот ќе има 47 пратеници. Иако се очекуваше дека ќе има добар изборен резултат, неговиот одличен скор го прави клучен играч за формирање на влада.
Ни Трифонов не се појави во јавноста, со оправдување дека имал симптоми на ковид и бил во изолација, па на својот Фејсбук профил само протоколарно ги пофали граѓаните за изборот.
За разлика од него, заменик-претседателот на движењето „Постои таков народ“, Ташко Јорданов, навести дека излезот би бил во спроведување на нови избори, со оглед дека тие не би соработувале со ниту една од најголемите партии.
„Ние нема да коалицираме со ГЕРБ, БСП, ДПС, ниту со оние на војводата шкембар. Ние, за разлика од нив, не лажеме. Ако нема договор, ќе има нови избори“, изјави Јорданов за ТВ 7/8 на неговиот лидер Слави Трифонов.
Од „Движењето за права и слободи“ (партија на Турците), кое според „Алфа рисрч“ би имало 30 пратеници немаа прецизен одговор на новинарско прашање дали би коалицирале со ГЕРБ доколку добијат таква понуда од Борисов. Како што рекоа, нивните ставови ги искажале во кампањата претходно, а за понатаму ќе ги почекаат официјалните резултати бидејќи не сакаат да даваат анализи на анализите кои ги прават други, мислејќи на агенциите.
Поранешниот министер за правда, Христо Иванов, предводник на „Демократска Бугарија“, исто така немаше прецизен коментар за понатамошниот развој на настаните, но порача дека тие ќе се залагаат за тоа Борисов да остане без власт. Според „Алфа рисрч“, Демократска Бугарија би имала 27 пратеници.
Задоволство од резултатите, иако неофицијални, изрази поранешната народна правобранителка Маја Манолова, лидерка на „Исправи се, и кажи“. Во онлајн студиото на бугарски „Дневник“ таа изјави дека не би коалицирала со Борисов и посочи дека нивни партнери остануваат Слави Трифонов и Демократска Бугарија на Иванов. Проекциите за нејзината партија се дека во парламентот ќе има група од 13 пратеници.
Ова се први избори во Бугарија во време на пандемија, а за 240 места во парламентот се бореа 6 895 кандидати од 30 партии и коалиции.