На предвремените парламентарни избори во април ќе се организира гласање и во дијаспората ако се пријават 6.700 избирачи
Државната изборна комисија (ДИК) планира за изборните активности за претстојните предвремени парламентарни избори да потроши 571 милион и 500 илјади денари околу 8 милиони евра). Од нив, најголем дел или околу 400 милиони (околу 6,5 милиони евра) се планира да се потрошат за финансирање на медиумската кампања на политичките партии што ќе учествуваат на парламентарните избори.
„За оваа намена за претседателските избори беа потрошени околу 3 милиони и 800 илјади евра. Сега во буџетот се предвидени нешто над 233 милиони денари, но во другите ставки имаме резерва да се дополнат некаде околу 400 милиони денари (6,5 милиони евра). Значи, има доволно средства. Сметам дека можеби ќе има потреба да се дополни оваа ставка, но ќе се обидеме тоа да го направиме со пренамена од останатите ставки каде што ќе заштедиме“,
рече претседателот на ДИК, Оливер Дерковски, на денешната седница на Комисијата.
Кога станува збор за дијаспората, пак, како што посочи Дерковски, таа ќе гласа доколку се пријават најмалку 6.700 наши гласачи.
„Ова е законски минимум од претходните избори што го освоил пратеникот кој добил мандат со најмал број гласови во нашата држава и тоа е услов за да може да се организираат наредни избори во дијаспората“,
појасни претседателот на ДИК нагласувајќи дека парите што се предвидени за организирање гласање во дијаспората ќе се потрошат само ако се исполни условот.
На минатите избори, во двата круга, потсети Дерковски, за гласање во дијаспората биле потрошени скоро 28 милиони денари (околу 455.000 евра).