Симеонов е шестиот пратеник што излегува од оваа партија, која вчера заедно со опозицијата го разреши претседателот на парламентот. Актуелната владејачка коалиција, пак, има вкупно 109 пратеници, а за да има мнозинство ѝ се потребни 121 глас во 240-членото Народно собрание
Партијата Има таков народ на Слави Трифонов остана без уште еден пратеник. Кирил Симеонов од собраниската говорница во бугарскиот парламент објави дека излегува од неговата досегашната партија.
Неговата партија излезе од владината коалиција, а вчера со нејзина помош опозициските ГЕРБ, ДПС и Преродба му изгласаа недоверба на досегашниот претседател на Народното собрание, Никола Минчев, и го сменија од функцијата.
Симеонов во емотивниот говор рече дека му е срам што вчера гласал заедно со ГЕРБ и ДПС.
„Влегов во политиката на апсолутно меритократски принцип – без партиски родители, без некој да ме поддржува, без да стојат бизнисмени зад мене. Кога го видов, Слави Трифонов ме праша: ’Зошто си тука, за што се бориш?‘ Јас му реков: ’Тука сум да се борам против овој систем и сатус кво‘. Но, вчера гласавме заедно со овој систем и се срамам од тоа. Јас сум должен да излезам и да се изјаснам – не сум ГЕРБ, не сум ДПС. Вечерва, кога ќе се вратам дома кај моите деца, ќе можам да ги погледнам во очи“,
рече Сименонов.
Кај пратениците од власта неговата одлука беше поздравена со громогласен аплауз.
„Ова е многу силна манифестација на парламетарнизмот и господине Симеонов го имате моето восхитување“,
рече привремениот претседател на Народното собрание Мирослав Иванов од партијата Продолжуваме со промените на премиерот Кирил Петков.
Пратеникот Симеонов е шестиот пратеник што излегува од пратеничката група на ИТН која броеше 25.
Утрово пратеничката од оваа партија, Ива Митева, рече дека се шпекулира оти и други нејзини сопартијци ќе го направат истото.
Заедно со Симеонов вчера за разрешување на Минчев гласаа вкупно 125 пратеници. Станува збор за членовите на опозициските ГЕРБ, ДПС и Преродба, како и доскорешниот владин коалициски партнер ИТН.
Со излегувањето на оваа партија од власта во актуелната бугарска влада остана три коалициски партнери: Продолжуваме со промените, Бугарската социјалистичка партија (БСП) и Демократска Бугарија. Тие во парламентот заедно имаат 109 пратеници.
За апсолутно мнозинство, кон кое тие целат, им се потребни 121 пратеник, со оглед на тоа дека Народното собрание брои 240 члена.