Тестирани се седум вакцини и сите до одреден степен го подигнуваат имунитетот на ковид-19, но најдобри резултати дале „Фајзер“ и „Модерна“
Вакцините од производителите „Фајзер“ и „Модерна“ даваат најдобри резултати како дополнителни, засилувачки дози, покажа истражување во Велика Британија во кое се тестирани седум различни вакцини, објави Би-би-си.
Ова е прво вакво тестирање во Обединетото Кралство кое треба да даде одговор на прашањето колку добро функционираат засилувачките дози. Тестирани се седум вакцини и сите до одреден степен го подигнуваат имунитетот на ковид-19.
Британија претходно одлучи да ги даде овие две вакцини како трета доза, а резултатите само ја оправдаа таа одлука.
Истражувачите велат дека има ветувачки знаци дека третата доза штити од болести и смртни случаи во случај на инфекција со варијантата омикрон.
Тие велат дека дури може да се даде и половина од дозата, за со моменталните резерви да се заштитат што повеќе луѓе.
Се верува дека резултатите од ова истражување го навеле Обединетото Кралство да порача дополнителни 114 милиони дози вакцини „Фајзер“ и „Модерна“ во следните две години, пишува Би-би-си.
Претходно оваа недела, од „Фајзер“ посочија дека засилувачките дози против ковид-19 треба да се даваат еднаш годишно.