Еден од заклучоците од истражувањето е дека нивото на антитела, чие производство е стимулирано со вакцината, било исто кај бремени жени и доилки, како и кај жени што не биле бремени
Вакцините против коронавирус на „Фајзер/Бионтек“ и „Модерна“ се ефикасни кај бремени жени и доилки и тие можат да пренесат антитела на новороденчињата, покажува истражувањето објавено во американското списание за акушерство и гинекологија.
Научниците од Општата болница во Масачусетс, Институтот „Рагон“, Универзитетот МИТ и Харвард проучиле 131 жена вакцинирани со овие вакцини, пренесува Си-ен-ен, а меѓу нив и 84 бремени жени, 31 доилка, додека 16 не биле бремени.
Истражувањето е спроведено од 17 декември 2020 година до 2 март оваа година.
Еден од заклучоците од истражувањето е дека нивото на антитела, чие производство е стимулирано со вакцината, било исто кај бремени жени и доилки, како и кај жени што не биле бремени.
Тимот дошол до заклучок дека нивото на антитела по вакцинацијата е „импресивно поголемо“ во споредба со оние што се создаваат по прележана инфекција со коронавирус за време на бременост.
„Овие вакцини се чини дека дејствуваат исклучително ефикасно кај овие жени“,
изјави еден од научниците, Галит Алтер, професор на Институтот „Рагон“ и додава дека нема докази дека имало повеќе несакани ефекти или поинтензивни несакани ефекти кај оваа група жени во споредба со општата популација.
Понатаму, истражувањето утврдило дека родилките им „пренесувале“ заштитни антитела на своите бебиња, кои биле откриени во мајчиното млеко и во плацентата.