Формиравме Секретаријат на историската комисија во кој ќе има кадри кои ќе им помагаат на членовите на Комисијата и во административниот дел на нивната работа во функција на поефикасно функционирање на историската комисија. Членовите сами ќе ги предложат кадрите кои ќе работат тука, а МНР ќе ги склучи само договорите и ќе ги плаќа, соопшти министерот Османи на денешниот брифинг
Освен новиот член во Заедничката историска комисија со Бугарија, кој е назначен по предлог на членовите на Комисијата, во однос на тековните работи за спроведување на обврските и од Договорот и од Протоколот, има уште две новости – тоа е Секретаријат на Комисијата и интерресорска работна група, соопшти денеска министерот за надворешни работи Бујар Османи.
„Формиравме Секретаријат на историската комисија во кој ќе има кадри кои ќе им помагаат на членовите на Комисијата и во административниот дел на нивната работа во функција на поефикасно функционирање на историската комисија. Членовите сами ќе ги предложат кадрите кои ќе работат тука, а МНР ќе ги склучи само договорите и ќе ги плаќа. Ние нема да предложиме ниту едно име, туку тие ќе си ги изберат соработниците“,
рече Османи.
Засега се побарани тројца асистенти во историскиот дел и двајца административни работниц, но ако има потреба ќе има и повече, бидејќи како што рече Османи, во овој процес многу е битен квалитетот.
На предлог на МНР се формирала и интерресорска работна група, којашто ќе ја раководи тој и четири тематски подгрупи на експертско ниво, што ќе го следат процесот на имплементација на обврските што произлегуваат од билатералниот Протоколот меѓу Северна Македонија и Бугарија. МНР веќе упатило допис до МВР околу еден случај на говор на омраза на социјалните мрежи кон граѓани што се изјаснуваат како Бугари и дека тоа е пример како ќе функционира овој дел од Договорот со Бугарија.
На новинарско прашање дали вчера историчарите на средбата во Скопје разговарале за Гоце Делчев, вели дека за ова е информиран колку и новинарите.
„И јас не сум повеќе информиран за работата на Комисијата, отколку вие, бидејќи Комисијата си е автономна во својата работа и во нивните разговори, во содржината на темите. Тоа што знам е дека воопшто не стигнале да работат за Гоце Делчев, а утринава има соопштение од опозициска партија дека се договориле за Гоце Делчев. Разбирам политичка дебата, меѓутоа класични лажни вести за да се манипулираат граѓаните е опасен преседан што го воведуваме во дневно-политичкиот дискурс“,
рече Османи, и ги охрабри членовите на Комисијата да бидат што поотворени со јавноста, оценувајќи дека со Секретаријатот ќе имаат можност повеќе да работат и да бидат во комуникација со медиумите.