Исплатата на пензиите за октомври ќе почне на 27 овој месец, а исплатата во готовина и овој пат ќе се реализира според висината на пензиите.
Владата, на денешната седница, како што се соопштува, ја разгледа и усвои информацијата за исплата на пензии за октомври 2020 година и го задолжи Фондот за пензиско и инвалидско осигурување да ги достави податоците за пензиите до деловните банки најдоцна до 26 октомври.
Владата им препорачува на деловните банки да обезбедат пензионерите со октомвриските пензии да може да располагаат преку мрежата на банкомати и во трговската мрежа од 27 октомври, а готовинска исплата на пензии за клиентите кои не користат картички да биде организирана во четири групи:
- Во вторник, на 27.10.2020 година исплата на пензии со висина до 11.000 денари;
- Во среда, на 28.10.2020 година исплата на пензии во висина од 11.001 денари до 14.000 денари;
- Во четврток, на 29.10.2020 година исплата на пензии во висина од 14.001 денари до 18.000 денари;
- Во петок, на 30.10.2020 година исплата на пензии во висина над 18.000 денари.