Министерот за надворешни работи Бујар Османи во интервју за ТВ Канал 5 во октомври лани рече дека инсистира во Комисијата да има и член Албанец бидејќи, според него, ова е заедничка битка
Исамедин Азизи, научен соработник – доцент во Институтот за национална историја е именуван нов член во Заедничка мултидисциплинарна експертска комисија за историски и образовни прашања меѓу Република Северна Македонија и Република Бугарија.
Тој ќе им се приклучи на моменталните членови на комисијата од македонска страна: претседател/координатор е академик д-р Драги Ѓорѓиев, член на МАНУ и професор на Институтот за национална историја (ИНИ) на УКИМ, професорите од ИНИ – Ванчо Ѓорѓиев, Петар Тодоров, Дарко Стојанов, како и историчарот Александар Литовски од Националната установа Завод и музеј – Битола, професорката Љубица Спасовска, научен соработник на Универзитетот во Ексетер, Велика Британија и Љупчо Ристески – антрополог, професор на Институтот за етнологија и антропологија на УКИМ.
Министерот за надворешни работи Бујар Османи во интервју за ТВ Канал 5 во октомври лани рече дека инсистира во Комисијата да има и член Албанец бидејќи, според него, ова е заедничка битка, така што заедничкиот ангажман за ова прашање ќе не зближи многу.
„Тоа е можност да се создаде блискост, но и да се остави наследство дека Албанците биле важен чинител кога се решавале некои важни прашања. Се разбира дека работам на тоа и наскоро ќе има решение. И се разбира дека јас ги согледувам работите и го утврдувам моментот кога е најдобро да се направи тоа за да не се направи штета на процесот,
рече Османи.
Од останатите именувања на денешната владина седница, Горан Сугаревски е поставен за в.д. директор на Царинската управа, Зулфикар Зејнулаи, за в.д. заменик на директорот во Дирекцијата за заштита и спасување, Александар Миљовски за в.д. директор на Јавната установа Национален Парк Галичица – Охрид, Кети Василеска за в.д. на Државниот управен инспекторат, во рамки на Министерството за информатичко општество и администрација.
На управните одбори на Агенцијата за енергетика и ЈП „Студенчица“ Владата им препорача да ги разрешат додегашните директори и на нивно место да ги именуваат Дарио Николовски, односно Ардита Дани.