Државниот министер за европски прашања на Ирска, Томас Брн, нагласил дека Северна Македонија има силна поддршка од ирската страна за што побрзо отпочнување на преговорите со ЕУ, бидејќи македонската страна ги исполнила сите услови и најавил гласна поддршка на претстојните состаноци на работните тела на Советот на ЕУ.
Брн поддршката и најавите ги истакнал на видеосредба со вицепремиерот за европски прашања Никола Димитров, која била побарана од ирската страна.
Од Секретаријатот за европски прашања (СЕП) нагласуваат дека акцент бил ставен на напорите што ги прави португалското претседателство за откочување на процесот и на предлогот на Португалија, кој е добра основа за надминување на проблемите и усвојување на преговарачката рамка за Северна Македонија.
Димитров, пак, се заблагодарил на поддршката и нагласил дека земјава останува посветена на европската агенда и дека натамошно одолговлекување на процесот на проширување е неприфатливо.
„Иако географски сме оддалечени, Ирска и Северна Македонија се споредливи по однос на многу карактеристики, а особено по определбата да дејствуваат како конструктивни партнери во Европа. Таа поврзаност неминовно нè упатува на интеграција и обединетост во вредностите, што се стремиме да ја заокружиме со заедничка европска иднина под знамето на Европската Унија. Сакам да изразам благодарност на Даблин за одлучното застапување на европските принципи и заложбата за фокусирање на суштината на пристапниот процес, а тоа е усвојување на европското законодавство, вредности и стандарди. Од македонска страна, остануваме посветени на европската агенда дома како аргумент плус за одржување на поддршката на нашите ирски пријатели за процесот на проширување чие натамошно одолговлекување е неприфатливо бидејќи е на штета на заедничките интереси“,
рекол Димитров.
Од СЕП додаваат и дека Димитров и Брн се согласиле дека доколку Северна Македонија ги отвори преговорите тоа ќе биде можност и за продлабочување на соработката со Ирска која може да го пренесе своето искуство во процесот на трансформација и реформите.