Комисиската седница на која директорот на АНБ реферираше за случајот со Онишченко беше затворена за јавноста, но додека течел исказот на Димовски дел од него се емитувал на јутјуб-каналот на Собранието. Поради тоа, седницата е прекината
Комисиската седница, на која директорот на АНБ реферира за улогата на Агенцијата во случајот со контроверзниот Украинец Олександр Онишченко, можно е да се одложи. Причината е тоа што додека течел исказот на Димовски дел од него се емитувал на јутјуб-каналот на Собранието. Пратениците во Комисијата во текот на седницата биле известени за пропустот, а за него пратеникот Павле Трајанов го известил претседателот на Собранието кој неофицијално побарал да се истражи кој е одговорен за пропустот.
Имено, на јутјуб-каналот на Собранието одела слика од пленарната седница, но и аудио од реферирањето на Димовски. Салата 4 каде што се одржува седницата на Комисијата за надзор на работата на АНБ и АР е испразнета, а собраниските служби ги свртија и бравите од вратата, односно ја заклучија. Димовски на излегување од салата, каде што ги чекаше пратениците да се вратат од пленарната седница, рече дека одат да проверат што се случило и дека најверојатно потоа ќе се врати да даде изјава.
Инаку, седницата на барање на Димовски, кое беше прифатено од пратениците, беше затворена за јавноста, што дава дополнителна тежина на случајот.