Потписниците на протестното писмо сметаат дека историскиот ревизионизам се применува за да се одржат старите и да се создадат нови митови, да се зајакнуваат стереотипите, да се развиваат предрасудите и омразата кон соседите
Универзитетски професори и доктори на науки од земјите на територијата на поранешна Југославија со протестно писмо реагираат на, како што велат, злоупотребата на историјата во политички цели. Според нив, македонските и бугарските интелектуалци и историчари не треба да дозволуваат историјата да биде манипулирана и користена во политички цели и во блокирањето на евроинтеграциите на С Македонија.
Потписниците на протестното писмо се потписници и на Декларацијата „Да ја одбраниме историјата“, проект кој има за цел да ја одбрани историската наука од историски ревизионизам. Тие сметаат дека историскиот ревизионизам се применува за да се одржат старите и да се создадат нови митови, да се зајакнуваат стереотипите, да се развиваат предрасудите и омразата кон соседите.
„Ние потписниците на ова писмо изразуваме протест и осуда на овој случај на ревизионизам и злоупотреба на историјата во политички цели. Сметаме дека таквиот пристап е опасен не само за историјата како хуманистичка дисциплина, туку и за демократијата и просперитетот на регионот, но и самата Европска Унија. Наметнувањето на ‘историска вистина’ е неправилно и опасно. Создавањето на македонската нација не се разликува од начинот на кој се создале другите нации, а правото на самоопределување е основно човеково право“,
се вели во протестното писмо.
Потписниците бараат од историчарите во С Македонија и Бугарија, но и во сите земји во регионот да бидат професионални и да се спротивстават на злоупотребите на својата професија.
„Од политичарите бараме да водат одговорна политика, да не ги поддржуваат историчарите кои предизвикуваат националистички конфликти и да не вршат притисок кој доведува до фалсификување на минатото. Од европските институции и држави бараме да реагираат на злоупотребата на историјата, почитувајќи ги основните принципи на Европската Унија кои овие денови на Балканот и во Европа се загрозени, а тоа се различноста, антифашизмот и демократијата. Европската Унија е создадена како лек против лошите искуства од минатото и затоа да не дозволиме да се искривува историјата уништувајќи ги принципите на кои се темели идејата за обединета Европа“,
се вели во протестното писмо.
Додаваат дека поддршка им се дава на интелектуалците и историчарите во С Македонија и Бугарија кои отворено се спротивставуваат на политичкиот притисок и се борат за заштита на својата професија и професионални стандарди.