Кривичниот совет сметал дека жалбите се неосновани и го потврдил претврдил претходното решение на судија на претходна постапка со кој е изречена забрана за отуѓување и располагање на имотот. Обвинителството смета дека станува збор за имот што потекнува од кривично дело и што е пренесен на трети лица за да се прикрие неговиот вистински сопственик
Имотот кој е дел од истрагата за случајот „Империја“ останува замрзнат, соопштија од Основниот кривичен суд Скопје.
Основното јавно обвинителство за гонење организиран криминал и корупција минатата недела поднесе барање за запленување, по што позитивна одлука донесе судија на претходна постапка. Две фирми чиј имот беше замрзат, „Дивелоп груп“ и „Бест вејт инвестмент“ поднесоа жалби, но кривичниот совет во скопскиот суд одлучил да ги отфрли како неосновани.
„Кривичниот совет на одделението за организиран криминал и корупција при Основниот кривичен суд Скопје, постапувајќи по жалби на правните лица ’Дивелоп груп‘ ДОО Скопје и ’Бест Вејт Инвестмент‘ ДООЕЛ Скопје, изјавени против шест решенијата на судии на претходна постапка, а поврзани со истрагата на ОЈО ГОКК за предметот познат како „Империја“, на 20.04.2022 година одржа седница на која по извршен увид во списите и ценејќи ги фактите приложени во жалбите донесе решенија со кои жалбите се одбиваат како неосновани, а решенијата од претходна постапка се потврдуваат во целост“,
соопштија од Основниот кривичен суд.
Барањето за запленување обвинителството го поднесе бидејќи се сомнева дека имотот потекнува од кривично дело и дека на крајот кога ќе заврши судската постапка за „Империја“ ќе биде потешко или оневозможено истиот да се одземе.
„Дотолку повеќе што од прибраниот доказен материјал произлегува дека предложениот имот е имот што е пренесен на трети лица за да се прикрие неговиот вистински сопственик“,
соопштија минатата недела од обвинителството.
Имотот за кој беше изречена забрана за отуѓување и располагање, како што објави обвинителството, опфаќа:
- удел на правното лице Друштво за производство, трговија и услуги „Дивелоп груп“ ДОО Скопје што го поседува во правното лице Хотел „Гранд М“ ДООЕЛ Скопје;
- удел на физичко лице од 67,5% што го поседува во правното лице Друштво за производство, трговија и услуги „Дивелоп груп“ ДОО Скопје;
- удел – основачки влог од 32,5% што го поседува правното лице – Друштвото за градежништво, трговија и услуги „Бест веј инвестмент“ ДООЕЛ Скопје во правното лице Друштво за производство, трговија и услуги „Дивелоп груп“ ДОО Скопје;
- недвижен имот евидентиран на правното лице – Друштво за трговија и услуги „Бизмис прперти инвестмент“ ДООЕЛ Скопје во вредност од 58 282 500 денари согласно книговодствената вредност и тоа апартмани со вкупна површина од 720 квадрати метри и гаражи со вкупна површина од 92 квадрати метри;
- хартии од вредност (7 213 акции) што правното лице Друштво за производство, трговија и услуги „Ексико“ ДООЕЛ Скопје, ги поседува во Стопанска Банка А.Д. Битола по номинална вредност од 3 000 денари по акција или во вкупна вредност од 21 639 000 денари; и
- недвижниот имот – деловен простор во градба лоциран на Плоштад Македонија и евидентиран во лист за предбележување издаден на носителот на правото на сопственост Друштво за производство, трговија и услуги „СИС Инвестмент груп“ ДООЕЛ Скопје во површина од 566,41 квадрати метри во вредност од 1 699 241 евра.
Заплената на имотот минатата недела беше прибележана и во Централниот регистар и во Агенцијата за катастар на недвижности – Центар за катастар на недвижности Скопје.
Во случајот „Империја“ беше под надлежност на СЈО. Кога ја отвори истрагата во 2018, од тогашното обвинителство соопштија дека меѓу осомничените се: Јордан Камчев, Сашо Мијалков, Ненад Јосифовиќ, Цветан Панделески, Ратка Куноска Камчева, Христина Камчева Стојческа, Зорица Арсовска, Лилјана Гајдовска, Владислав Стајковиќ, Тодор Мирчевски, Дејан Јанев, Ванче Мијалчев и Јованче Тасковски. Тие се гонеа поради основано сомнение за сторени кривични дела злосторничко здружување, оштетување или повластување на доверители, злоупотреба на службената положба и овластување, измама и перење пари и други приноси од казниво дело.
Сега истрагата е завршена, и се очекува по поднесувањето на обвинението да биде познато и дали и кои лица ќе бидат опфатени со обвинителниот акт.