Димитар Ковачевски, кого досегашниот лидер на СДСМ го промовира како свој адут, веќе започна да ја презентира својата програма пред членовите на партијата и јавноста, додека Ременски вели дека би било коректно претседателот во заминување да ги поздрави трите кандидатури, наспроти Деспотовски, кој посочува дека Заев има право на свој став пред изборите
Претседателот на СДСМ во заминување, Зоран Заев, вчера јавно му ја даде својата поддршка на кандидатот Димитар Ковачевски, во пресрет на внатрепартиските избори за нов лидер кои ќе се одржат на 12 декември.
Покрај Димитар Ковачевски, во трката за нов претседател на СДСМ се и актуелниот в.д директор на Дирекцијата ТИРЗ, Јован Деспотовски, како и поранешната потпретседателка на партијата Фросина Ременски.
За отворената поддршка на Заев кон Ковачевски, Јован Деспотовски во изјава за „360 степени“ вели дека го почитува Заев и смета дека тој има право на свој став во изборниот процес, но смета дека трката за претседател треба да започне еднакво за сите.
„Имам голем респект кон претседателот Зоран Заев и тоа сум го покажал во изминатите 20 години, колку што се познаваме. И тој, како и сите останати членови на СДСМ, има целосно право на свој став во овој процес на избори. Сепак, не мислам дека на кандидат за претседател на СДСМ, било да е тоа Димитар, Фросина или Јован му е потребна поддршка за каква е создаден впечаток кај дел од јавноста, за да покаже дека е квалитетно решение. Делумно се согласувам дека ваквиот впечаток носи ризик и да создаде непотребен товар врз новиот претседател, кој и да е. Сакам да верувам дека натпреварот започнува со 0:0 и дека сите тројца кандидати ќе имаме ист терен, со исти правила и чесни судии. Токму затоа и се откажав од правото да определам претставници со избирачки тела на партијата. Изборите за претседател на СДСМ треба и ќе бидат натпревар на идеи, предлози и концепт на работење. На углед, образ и знаење. Треба да покажеме и пред членовите, но и пред сите наши сограѓани дека некои лекции од минатото се научени и СДСМ се менува и развива“,
ни изјави Деспотовски.
Фросина Ременски, пак, вели дека би било коректно претседателот во заминување да ги поздрави трите кандидатури, а на тајното гласање на 12 декември да го заокружи својот фаворит.
„Сите активни членови кои имаат право да гласаат за предложените кандидати тоа ќе го направат на тајно гласање. Тоа што претседателот Заев на новинарско прашање одговори за неговата поддршка, тој всушност јавно кажа како ќе гласа. Јас очекувам Заев да ги поздрави и кандидатурите на сите тројца кандидати за оваа внатрепартиска трка. Секое наметнување од врвот на какво било решение во изминатиот период се покажа како непродуктивно и се плашам дека со таков еден став и пристап нема да им се помогне на членовите, независно дали се однесува за мене, за Деспотовски или за Ковачевски. Секако, лидерот е лидер, но фактот што тој одлучил да замине од таа позиција му дава за право да има симпатии или афинитет кон некого, но тоа коректно е да го направи на тајно гласање, затоа што може погрешно да се наведе или да рефлектира непринципиелен однос во оваа битка која што ја квалификуваме како демократска“,
вели Ременски за „360 степени“ и додава дека многумина била изненадени од нејзината кандидатура, а очекува истите да доживеат уште поголемо изненадување и од резултатите.
Поранешниот организациски секретар на СДСМ, Миле Зечевиќ, кој најави кандидатура за лидер на СДСМ, но потоа се повлече, изјави денеска дека не е исклучок и во другите политички партии лидерот да го избере својот наследник, односно кандидатот за наследник за кој смета дека најмногу ќе придонесе за зачувување на она што значи партиско единство.
Ковачевски веќе почна да ја презентира својата програма пред членовите на партијата и јавноста, а денеска порача дека СДСМ останува отворена за сите и тој нема да поддржува заткулисни партиски крила.
„Партијата е отворена за сите, јас сум човек кој не поддржува заткулисни партиски крила и струи, тоа не треба да ни ја одзема енергијата во работењето. Сите имаме иста цел, партијата да ги реализира ветувањата, да работи и го унапредува животот на граѓаните а за тоа мора да сме обединети и многу да работиме. Го истакнувам ова затоа што партијата е организација чие добро функционирање зависи од придонесот на секој член. Само заеднички, организирано и со јасно поделени одговорности и задачи, СДСМ може да биде силна е исполнителна“,
истакна Ковачевски.
На 12 декември во СДСМ ќе се одржат вторите внатрепартиски избори – само девет месеци по првото непосредно изјаснување на членството, кога кандидат беше само Зоран Заев.
Лидерот што ќе биде избран на 12 декември ќе биде петтиот во историјатот на СДСМ. Освен на претстојните избори, во минатото уште на два конгреса на СДСМ имаше внатрепартиска битка за челната функција: На конгресот во 2004 година, Црвенковски, како дотогашен лидер на партијата, застана зад Владо Бучковски наспроти двајцата негови противкандидати, Радмила Шекеринска и Тито Петковски. Бучковски победи на конгресот по вториот круг на гласање во кој учествуваше и Шекеринска; На конгресот во 2013 година, пак, Црвенковски, кој тогаш најави повлекување од политиката, застана зад кандидатурата на Зоран Јовановски, наспроти другите двајца кандидати – Заев и Кире Наумов. Сепак, тогаш фаворитот на Црвенковски ја изгуби битката од Заев, кој, пак, настапуваше во тандем со Шекеринска, која потоа во два мандати беше заменик-претседателка на СДСМ.