Филков, кој во министерската фотелја седнува како кадар на Движењето ЗНАМ – За наша Македонија, на примопредавањето на функцијата најави дека во периодот што следува ќе се обрне поголемо внимание на измените на законите за Судски совет, за Јавно обвинителство и за Совет на јавни обвинители
Игор Филков денеска ја презеде функцијата министер за правда од неговиот претходник Кренар Лога кој на оваа позиција беше од февруари 2023 година.
Филков, кој во министерската фотелја седнува како кадар на Движењето ЗНАМ – За наша Македонија, на примопредавањето на функцијата најави дека во својот мандат ќе преземе реформи во сферата на правосудството и засилување на борбата против криминалот и корупцијата.
Според Филков, ќе следува и деполитизација на судството и обвинителството, враќање на довербата на граѓаните во правосудниот систем и владеење на правото.
„Во периодот што следува ќе се обрне поголемо внимание на измените на законите за Судски совет, за Јавно обвинителство, за Совет на јавни обвинители, спроведување на реформската агенда во рамки на процесот на имплементација на Планот за раст на Западен Балкан, Патоказот за владеење на правото кој ќе ги исцрта насоките на реформите и мерките до крајната цел – завршување на преговорите, како и вклучување на земјите кандидати во Извештајот за владеење на правото како инструмент за рана детекција или превенција на предизвиците со владеењето на правото“,
рекол Филков на преземањето на функцијата, информираат од Министерството за правда.
Од партијата на Филков, кога го најавија неговото назначување за министер за правда, рекоа дека тој е претседавач на Централниот одбор на движењето ЗНАМ – За наша Македонија и член на Извршниот одбор. Од партијата велат дека тој бил приватен стопанственик, управител на компанијата „Спектрум медикал“ од Скопје, а претходно бил надворешен соработник на проектот на ФАО – канцеларија Скопје.
Новата влада беше избрана синоќа со 77 гласа „за“ и 22 гласа „против“, а нејзин претседател е Христијан Мицкоски.
Владината коалиција ја сочинуваат партиите ВМРО-ДПМНЕ, ЗНАМ и коалицијата „Вреди“.