„Како политичка партија немаме забелешки и не сме се замериле со никого, си тераме своја политика. Единствено случајот со извршителите што го зборував. Дали тоа е причината или нешто друго, се надевам дека брзо ќе дознаеме“, вели лидерот на ПЦЕР
Пред клубот на Партијата за целосна еманципација на Ромите (ПЦЕР), кој се наоѓа во кафуле во Тетово, рано утрово е фрлена неактивирана рачна бомба, информира лидерот на партијата Самка Ибраимовски, пренесува МИА.
За случајот Ибраимовски утрово е информиран од член на партијата што го држи клубот.
„Му реков да повика полиција. За среќа, бомбата не се активирала и нема повредени. Не чепкавме ништо, дојде полицијата и почна да работи на случајот“,
вели тој.
Посочи дека настанот е забележан од камера што служи за видеонадзор, од чии снимки се гледа како сторителот прво го крши едното стакло од вратата на клубот и ја остава бомбата, а потоа се враќа да ја провери.
„Видеоснимки постојат и ќе се најде сторителот. Во 4:23 часот дошол пред клубот, го скршил стаклото и ја оставил бомбата. Имал храброст да се врати и да проверува дали ја активирал или не. Среќа што бомбата не била активирана, оти сигурно би направила голема штета“,
рече Ибраимовски.
Раскажувајќи за случајот, Ибраимовски вели дека нивниот член што утрово прв дошол во клубот почнал да го мете скршеното стакло, но среќа е што не ја активирал бомбата.
„Се работи за бомба-кашикара од постар тип што има големо разурнувачко дејство“,
вели тој.
Ибраимовски не знае зошто некој сакал да го демолира клубот.
„Како политичка партија немаме забелешки и не сме се замериле со никого, си тераме своја политика. Единствено случајот со извршителите што го зборував. Дали тоа е причината или нешто друго се надевам дека брзо ќе дознаеме“,
рече тој.
Екипи на СВР Тетово извршија увид на настанот, а фрлената неексплодирана бомба е отстранета.