Претходно, Аријанит Хоџа се отцепи од Беса и ја формира Европската демократска партија, а Изет Меџити, кој беше дел од „огнените“ во ДУИ, ја промовира партијата Демократско движење
Поранешниот пратеник од Алтернатива, а сега независен, Скендер Реџепи Зејд, ќе формира политичка партија.
Во гостувањето во емисијата „Клик плус“ на ТВ 21 изјави дека тоа доаѓа како резултат на незадоволството во Алтернатива каде што не дале можност за промена во партијата, како и дека не се гледа себеси како дел од некоја друга партија која во моментов е активна.
„Сме виделе и во отчетот и средбите со граѓаните, дека имаме поддршка од граѓаните за политичкиот пат што го градам. Бидејќи не се гледам себеси кај ниту еден политички субјект, бидејќи верував дека во Алтернатива треба да работам, бидејќи моето излегување потврди дека промената мора да се направи, но кога видов дека тоа не може да се случи, така што веројатно ќе почнам ново политичко патување заедно со структурите што ги имаме. Ќе им подадам рака за соработка на тие што излегоа од Алтернатива, заедно да почнеме ново политичко патување“,
вели Реџепи за ТВ 21.
Скендер Реџепи Зејд ја напушти Алтернатива во јуни лани откога дејствува како независен во Собранието. Тој е третиот пратеник од албанскиот политички блок кој реши да формира нова партија. На 12 август поранешниот заменик-претседател на Беса, Аријанит Хоџа, ја формира Европската демократска партија, а еден ден подоцна Изет Меџити, кој беше дел од „огнената група“ во ДУИ, ја промовира партијата Демократско движење.