Дел од членовите на ВМРО-ДПМНЕ од Општинскиот комитет Карпош денеска ја поддржаа иницијативата за свикување вонреден конгрес на партијата и го обвинија лидерот Христијан Мицкоски дека не сака да понесе одговорност за лошиот резултат на парламентарните избори.
„Вистината е дека во Карпош освоивме мал број гласови, речиси 5 000 гласа помалку од минатите парламентарни избори. Вистината е дека Мицкоски загуби во неговиот матичен општински комитет. Вистината е дека Мицкоски загуби и во неговиот месен комитет и на неговото избирачко место. Мицкоски загуби меѓу граѓаните кои најдобро го познаваат“,
изјави Сашо Лазаревски од ОК на ВМРО-ДПМНЕ во Карпош.
Тој во изјавата што ја прочита во присуство на повеќе од дестина сопартијци, рече дека за овие порази вината не треба и не смее да се бара во членовите, активистите и месните комитети, туку кај Мицкоски и неговото тесно раководството.
Оваа изјава на дел од членовите на ОК на ВМРО-ДПМНЕ во Карпош предизвика поделби во огранокот.
На фејсбук-страницата на огранокот на ВМРО-ДПМНЕ од Карпош оние кои не се согласуваат со ваквиот став ги обвинија сопартијците дека работат на свесно слабеење на партијата и во полза на СДСМ.
„Скришната изјава, без покана за медиумите, на кумот на Нино Тодоров, Сашо Лазаровски говорат за фингирано сценарио за свесно слабеење на ВМРО-ДПМНЕ што единствено е од помош за криминалната и неспособна Влада на СДСМ. На поширокото членство уште пред изборите им беше јасно за целите и мотивите за ваквите настапи, а кои денес се претставници и содружници на МК Мериот и хотелската коалиција“,
се вели на официјалниот профил на ОК ВМРО-ДПМНЕ Карпош на Фејсбук, од каде што му даваат целосна поддршка на претседателот Мицкоски, органите на партијата и Статутот на партијата.
Членови на ВМРО-ДПМНЕ од скопската населба Аеродром вчера излегоа со поддршка за иницијативата за одржување вонреден конгрес на партијата, што исто како во случајот со ОК во Карпош следуваше официјална ограда од ваквиот став од раководството на општинскиот комитет во оваа скопска населба.
Изминатите денови, во име на Иницијативниот одбор за одржување на вонреден конгрес, прес-конференција одржа поранешниот градоначалник на Дојран, Борче Стамов, кој порача дека Мицкоски не донел ниту една победа и нема причина да биде привилегиран пред Љупчо Георгиевски и Никола Груевски, кои се повлекоа по првиот пораз на избори.
Дел од овој иницијативен одбор е и поранешниот градоначалник на Аеродром, Ивица Коневски.
*Поврзани вести:
Членови на ВМРО-ДПМНЕ со иницијатива за вонреден конгрес на партијата и оставка од Мицкоски
И Ивица Коневски бара промени во ВМРО-ДПМНЕ
Ѓорѓиевски: До ВМРО-ДПМНЕ нема барање за вонреден конгрес, ако стигне, ќе го разгледаме