Пратеничката Калевска Ванчева вели дека, и ако успее иницијативата на опозицијата, СДСМ би требало повторно да го добие мандатот за формирање нова влада
Добра вест, премиерот ќе продолжи, оваа Влада ќе продолжи, изјави лидерот на ДПА, Мендух Тачи, вечерва за ТВ 24, по состанокот во Владата на коалициските партнери кои се дел од мнозинството.
Тачи, единствениот пратеник на ДПА во Собранието, рече дека парламентарното мнозинство е стабилно и оти очекува Владата и премиерот Зоран Заев да продолжат да функционираат.
„Мнозинството е стабилно, го овластивме премиерот, нормално, ќе разговара и со други политички групации или пратеници да имаме уште поголемо мнозинство. Конечно, најдобрата вест е дека оваа Влада, ова мнозинство продолжува и на 15 декември. Се надевам, 99,9 отсто, дека ние ќе добиеме датум“,
вели Тачи.
Од друга страна, пратеникот на ВМРО-ДПМНЕ, Миле Лефков, во емисијата „Топ тема“ на Телма, рече дека седницата ќе биде одржана утре и дека конечно ќе биде изгласана недоверба на Владата.
„Ова се прави за народот, затоа што конечно е потребно да престанат игрите на Зоран Заев кој што дава па повлекува оставка, па се губиме во некои правни лавиринти. Интересот ве уверувам не е наш, со ова го слушаме гласот на граѓаните затоа што навистина е потребно час поскоро да се случи таа оставка. Конечно да се ефектуира за она што се зборуваше, и конечно Македонија да може да почне со некои нови поспособни луѓе, да почне да ја создава таа нова иднина. Оваа влада целосно го загуби кредибилитетот и граѓаните го кажаа тоа. А, утре кога ќе се изгласа недовербата во Собрание, ќе видат дека сме заедно и против корупција, криминал, против тоа да ни минуваат наркотици низ државата и да ги возат началници. Ќе кажеме дека сме против тоа да ни горат луѓе во монтажна болница и да нема никаква одговорност за тоа. Утре е денот кога ќе падне оваа влада“,
изјави Лефков.
Во истата емисија, пратеничката на СДСМ, Снежана Калевска Ванчева, рече дека единствено што е предвидливо во овој момент е дека утре ќе имаме седница, што не значи истовремено ниту доверба ниту недоверба на Владата.
Таа додаде дека треба да помине седницата и секој да каже што мисли и некаде пред полноќ ќе биде гласањето, И дури тогаш може да се каже дека има една или втора ситуација, бидејќи секој пратеник гласа согласно своето убедување.
„Никој не може да тврди што ќе се случи утре вечер. Ако успее иницијативата јасно е дека треба да дојдеме до компонирање на нова Влада, која треба да биде потврдена во Собранието. Во таков случај, очекуваме ние да го добиеме мандатот, веруваме дека на крајот на денот сепак влада ќе состави СДСМ со коалиционите партнери и тој коалиционен капацитет не бил нарушен, оти почива на вистински вредности. Со никого не сме се простиле и не сме затвориле врата, освен на оние што не се јасно за евроатлантските интеграции и не не поддржуваат на патот на прогресот и демократијата, што бараат да се укине признавањето на Косово, Охридскиот договор, Преспанскиот договор, како и заради тоа што веќе станавме членка на НАТО и многу сериозно веруваме дека сме пред започнување на преговори со ЕУ“,
нагласи Калеска Ванчева.