Тие ги повикаа сите меѓународни авиокомпании да ги откажат сите редовни летови кон израелските аеродроми, за да ја зачуваат безбедноста на своите летала
Јеменската бунтовничка група хути синоќа соопшти дека ќе работи на сеопфатна воздушна блокада на „израелскиот непријател“ со повеќекратно гаѓање на аеродромите, пред сè аеродромот „Бен Гурион“ во Тел Авив, јави Саба.
Тие ги повикаа сите меѓународни авиокомпании да ги откажат сите редовни летови кон израелските аеродроми, за да ја зачуваат безбедноста на своите летала.
Хутите наведоа дека Јемен нема да прифати напади на арапски земји како што се Либан и Сирија.
„Ова потврдува дека оваа нација нема да се плаши од судири и дека ќе го отфрли покорувањето и потчинувањето“,
истакнаа хутите.
Израелскиот премиер Бенјамин Нетанјаху, претходно вчера изјави дека Израел ќе им одговори на хутите и на нивните ирански „господари“, откако јеменската бунтовничка група поддржана од Техеран изведе ракетен напад на главниот меѓународен аеродром во Израел.
„Нападите на хутите доаѓаат од Иран“,
напиша Нетанјаху на социјалната мрежа Икс.
Тој истакна дека Израел ќе одговори на нападот на хутите во време и на место што ќе го избере кога ќе ги гаѓа „нивните ирански терористички господари“.
Претходно вчера, балистичка ракета на хутите падна во подрачјето на аеродромот „Бен Гурион“ откако Израелските одбранбени сили (ИДФ) не успеаја да ја пресретнат. По нападот, големи странски авиокомпании, меѓу кои германската „Луфтханза“ и француската „Ер Франс“, ги прекинаа летовите кон Тел Авив најмалку до вторник.