По наредба на бугарскиот министер за надворешни работи, Светлан Стоев, денеска на разговор била повикана хрватската амбасадорка во Софија, Јасна Огњеновац. Како што информира МНР на Бугарија таа била примена од генералниот директор за европски прашања, Румен Александров, а причината за разговорот е изјавата на хрватскиот претседател, Зоран Милановиќ, по Самитот на Словенија и Хрватска со земјите од Западен Балкан, одржан на 17 мај 2021 година во Бардо кај Крањ, во кој тој остро ја нападна политиката на Бугарија кон евроинтеграција на С Македонија.
Пред амбасадорката Огњановац, генералниот директор ја опишал изјавата на претседателот Милановиќ како неприфатлива и неоправдана. Амбасадорката треба да го пренесе ставот на Бугарија на официјален Загреб.
Хрватскиот претседател Милановиќ, пред два дена рече дека Македонија се наоѓа во една невозможна позиција во процесот на евроинтеграциите.
„Ова што сега е официјална политика на една земја-членка на ЕУ и го прави на Северна Македонија и јас го нарекувам „влегување во туѓо“, односно влегување во интимниот простор. Да се бара од една земја кандидат, која и во преговори за членство, во учебниците по историја својата национална генеза да ја дефинира, онака како што тоа го бара соседна држава. Тоа е влегување во интимен простор и тоа не се прави. И, на тоа, отворено ќе се спротивставам“,
рече Милановиќ.