Според евиденцијата на ХЗЈЗ, во Хрватска досега од голема кашлица се разболеле 2 312 лица, најмногу во градот Загреб, а потоа и во Сплитско-далматинската жупанија. Најголем број заболени се на возраст од 10 до 14 години
Сè зголемува бројот на заболени од голема кашлица во Хрватска, најмногу кај децата, а низ цела земја се организирани пунктови за тестирање на инфекција, јавува порталот Индекс.
Досега во Хрватскиот завод за јавно здравје (ХЗЈЗ), како што информираат оттаму, се тестирани 5 342 пациенти, од кои околу 35 отсто биле позитивни.
„Ова е најголемиот број пациенти со голема кашлица во Хрватска во последните 40 години“,
нагласуваат од ХЗЈЗ.
Според евиденцијата на ХЗЈЗ, во Хрватска досега од голема кашлица се разболеле 2 312 лица, најмногу во градот Загреб, а потоа и во Сплитско-далматинската жупанија. Најголем број заболени се на возраст од 10 до 14 години.
„Ова е најголемиот број на пациенти со голема кашлица во Хрватска во последните 40 години. Се започна летово во Сплитско-далматинската жупанија, која, заедно со Дубровничко-неретванската жупанија, има најслаба вакцинација на детската популација, не само против оваа, туку и од други заразни болести, за разлика од Вуковарско-сремската и Меѓумурската жупанија кои водат во нивото на вакцинација на населението во Хрватска“,
наведуваат од ХЗЈЗ и додаваат дека болеста во најголема мера се проширила во Загреб и околината од минатата есен.
Најзагрозени од оваа болест се новороденчињата и доенчињата, каде што болеста може да биде многу тешка, а во некои случаи дури и фатална. За децата кои ги примиле сите потребни вакцини, болеста не е опасна, а во повеќето случаи нема сериозни компликации. Почетните симптоми на болеста се зголемена телесна температура и шмркање, а продолжува со зголемена кашлица, често со отежнато дишење при посилно вдишување. Понекогаш предизвикува и повраќање. Закрепнувањето може да трае со недели, па дури и месеци.
Директорот на Хрватскиот завод за јавно здравје Крунослав Чапак посочува дека и покрај намаленото ниво на вакцинација во последните години во одредени делови на Хрватска, не се применуваат репресивни санкции против родителите, туку се прибегнува кон зголемување на информираноста на граѓаните и советување за ефикасноста на вакцините во заштитата на здравјето на повеќето ранливо население.
ХЗЈЗ: Вакцинацијата сè уште е најефикасна заштита за новороденчињата и доенчињата
Вакцинацијата против голема кашлица и други заразни болести и натаму е најефикасна заштита за новороденчињата и доенчињата, како и за децата од друга возраст, која се спроведува според програмата за вакцинација, посочуваат од ХЗЈЗ.
Во ова време на ширење на голема кашлица се препорачува вакцинација и за трудниците, за да се заштитат новороденчињата со мајчински антитела до моментот кога детето ќе може да се вакцинира и со тоа да стекне сопствен имунитет.
„За жал, како за време на пандемијата на ковид-19 така и сега, во јавниот простор има такви кои шират непроверени и научно неосновани информации за големата кашлица, за штетноста на вакцинацијата против научно и практично докажаниот факт со години како најмногу ефикасна заштита на децата и возрасните не само од голема кашлица, туку и други заразни болести, како и на оние кои се обидуваат да го политизираат ова исклучиво здравствено прашање“,
посочува Чапак.