За само неколку часа се распродале сите билети што УЕФА ги намени за Хрватска за нивниот прв натпревар од осминафиналето.
Продажбата на билетите за „хрватскиот сектор“ на стадионот во Копенхаген започна денеска во 11 часот, а околу 15 часот беа распродадени сите расположливи билети, објави попладнево Хрватската фудбалска федерација, најавувајќи голема поддршка од трибините за „коцкестите“ за натпреварот против Шпанија, на 28 јуни од 18 часот.
Хрватскиот селектор Златко Далиќ им честиташе на своите фудбалери за пласманот во нокаут фазата на Eвро2020, оценувајќи дека тие апсолутно доминирале во триумфот од 3:1 над Шкотска во Глазгов.
„Им честитам на моите момчиња на одлично одиграниот натпревар и пласманот во осминафиналето. Овој натпревар беше голем тест, пред сè за мене, а потоа и за сите останатите, да останеме мирни и сталожени“,
изјави по натпреварот Далиќ.
Тој рече дека не е ниту важно кој ќе биде нивниот следен противник, но дека посакува во осминафиналето да има голем број хрватски навивачи на трибините.
„Со навивачите сме посилни“,
рече Далиќ.