Генералниот секретар на Беса ја отфрли можноста и тие да се приклучат кон коалицијата на СДСМ и ДУИ за локалните избори, а на прашањето за гласините дека тој ќе биде кандидат за градоначалник на Скопје, Хоџа рече дека би ја прифатил таа улога на изборите ако така реши партијата
Генералниот секретар на Беса, Арјанит Хоџа, вели дека не би сакале како партија да го коментираат вчерашниот договор на Зоран Заев и Али Ахмети за соработка на СДСМ и ДУИ на претстојните локални избори.
Како што рече Хоџа, ќе се воздржат од коментари зашто не се познати детали од тоа што договориле двајцата лидери.
„Не би коментирале договори на лидери на политички партии иако се дел од владејачката коалиција. Реално гледано, ние не знаеме за деталите за тоа што е зборувано, како Движење Беса сме кажале дека се подготвуваме за да излеземе сами на локалните избори бидејќи цениме дека нашето присуство во Владата направи разлика и таа разлика сакаме да се отслика во делот на гласовите. Како политичка партија сакаме реално да видиме како се отсликало нашето 10 месечно владеење односно скоро една година до локалните избори. Оставаме да се објават детали од договорот бидејќи изјавата е многу општа, па да почекаме да видиме врз основа на што ќе се држи таа коалиција“,
изјави Хоџа.
Тој ја отфрли можност Беса да се приклучи кон оваа коалиција, а најави дека е можно партискиот врв на ова движење да влезе во трка на локалните избори.
„Апсолутно не, бидејќи сме кажале дека настапуваме со наши кандидати и затоа се воздржувам во тоа што го кажувам, не знаеме што опфаќа договорот. Многу е општа изјавата во делот на давање насоки дека негде во прв, негде во втор круг ќе соработуваат, така што без да знаеме каде во прв, каде во втор круг, не би сакале да коментираме. Меѓу другото, ние сме сериозна политичка партија и сме кажале дека настапуваме со наши кандидати и квалитетни кадри. Можам да кажам дека врвот на партијата влегува на локалните избори и тоа кажува за нашата сериозност во делот на тоа како ги цениме локалните избори“,
изјави Хоџа.
На прашање дали се точни гласините дека тој лично ќе се кандидира за градоначалник на Скопје, генералниот секретар на Беса и актуелен министер за земјоделство рече дека ќе ја прифати таа улога ако тоа биде одлука која ќе ја донесе партијата.
„Јас вчера бев избран за шеф на изборниот штаб на партијата и мојот фокус е подготовката за изборите. За која било улога што партијата ќе цени дека е битна, воопшто не би бегал од одговорност. Јас и со адреса на живеење не сум во Скопје, но да оставиме на времето, да видиме како ќе се одвиваат работите. Сè што партијата ќе цени дека е важно за партијата, јас нема да се спротивставам бидејќи сум докажан како личност, но и Беса како партија докажа дека функционирањето како екипа е клучен фактор што води до повисок рејтинг“,
рече Хоџа.