Говорејќи за врските меѓу Србија и Русија, тој наведува дека многу јасно ставиле до знаење дека би сакале Србија да се приклучи на санкциите против Москва, но додаде дека Белград презел некои важни чекори за да ѝ стави до знаење на Русија дека не се согласува со агресијата што ја изврши врз својот сосед, Украина
Амбасадорот на Соединетите Американски Држави (САД) во Белград, Кристофер Хил изрази уверување дека формалното признавање на Косово нема да биде услов за влез на Србија во Европската Унија (ЕУ), туку нормализација на односите со Приштина.
Хил во интервју за српскиот неделник НИН објавено денеска, во врска со ова прашање вели дека Европејците го бараат од Белград „токму тоа што велат дека го бараат“, а тоа е нормализација на односите, додавајќи дека ЕУ сака мир и безбедност во регионот и секако меѓу Косово и Србија.
„Мислам дека тие многу јасно кажаа оти има членки на ЕУ кои не го признаваат Косово, така што вистинското прашање е да се обидеме да дојдеме до нормализација таму каде што тие граници нема да бидат граници што разделуваат, туку граници кои спојуваат, граници кои навистина ги спојуваат“,
вели американскиот амбасадор во Србија, пренесува регионалниот сервис на Радио Слободна Европа (РСЕ).
САД, вели Хил, ги поддржуваат аспирациите на Србија да стане членка на ЕУ и се обидуваат да ѝ помогнат во тој потфат, бидејќи, како што додава, сосема е јасно дека Србија во иднина ќе биде во Европската Унија.
Говорејќи за врските меѓу Србија и Русија, тој наведува дека многу јасно ставиле до знаење дека би сакале Србија да се приклучи на санкциите против Москва, но додаде дека Белград презел некои важни чекори за да ѝ стави до знаење на Русија дека не се согласува со агресијата што ја изврши врз својот сосед, Украина.
„Имаме многу добар дијалог со Србија. И, да, Србија презеде некои многу конкретни мерки за да ѝ даде до знаење на Русија дека она што го направи во Украина не може да се одржи. И порано или подоцна Русија ќе мора да постигне мировен договор и да се повлече од Украина. Така што мислам дека добро се разбираме со Србија“,
вели Хил.
Во насока на односите меѓу САД и Србија, Хил кажа дека тие имаат многу добар дијалог, иако не се согласуваат за сè, како, на пример, за Косово.
„Но, ние се согласуваме за неопходноста од мир и безбедност во Европа. И мислам дека многу се согласуваме со фактот дека руската агресија врз Украина треба да престане. Затоа, мислам дека имаме многу што да градиме. И она што би сакал да видам е да направиме повеќе. Мислам дека нашите две нации имаат многу заеднички работи. И би сакал да видам врски кои ќе се зајакнуваат во наредните години“,
вели тој во интервјуто.
Во врска со „Сесрпското собрание“, што се одржа во саботата во Белград, Хил рече дека сите мора да разберат дека Дејтонскиот договор е основа на територијалниот интегритет на Босна и Херцеговина и територијалниот интегритет на ентитетите во БиХ и дека тие елементи на Дејтон мора да бидат почитувани од сите страни.
Тој изрази надеж дека вооружениот инцидент меѓу српската паравоена група и косовската полиција, во селото Бањска во септември 2023 година, „ќе дојде на суд“ и дека „ќе има одредена одговорност за она што се случи“.
„Тоа сигурно не беше ден кој им помогна на српските интереси, а сигурно не им помогна ниту на американско-српските односи“,
додаде Хил.
Тој исто така рече дека САД се „многу разочарани“ што во владата на Србија повторно има две лица кои се под американски санкции – вицепремиерот Александар Вулин и министерот без ресор Ненад Поповиќ.
„Видете, морам да согледувам кој е најдобриот пат напред за работите што се обидуваме да ги направиме со Владата на Србија. И кога коментирате за поединци во владата на Србија, не сум сигурен дека тоа е најдобриот начин за напредување. Ние секако ги искажавме нашите ставови за нив двајца и мислам дека тоа ќе го оставам настрана и ќе продолжам со она што го правам овде“,
вели американскиот амбасадор во Белград.
Прашан за критиките што му ги упати лидерот на опозицијата Драган Ѓилас за неговата изјава дека немало миграција на гласачите на локалните избори на 2 јуни и покрај фактот што претседателот на Република Српска, Милорад Додик гласаше на локалните избори во Белград, Хил рече дека Србија „сигурно има некои прашања што треба да ги реши на избори“, додавајќи оти смета дека има напредок од декември.
„А што се однесува до господинот Ѓилас, навистина не сакам да комуницирам со луѓето преку медиумите, повеќе би сакал директно да го правам тоа. Мислам дека е многу поефикасно и многу почесно да се направи тоа“,
вели американскиот дипломат.
Во врска со недовербата и огорченоста што постои кон САД поради бомбардирањето на НАТО во 1999 година, Хил рече дека „сè може да се промени“, но дека „често е потребно повеќе време отколку што би сакале“.
„Никогаш не би барал од луѓето да го игнорираат минатото, но, знаете, за доброто на нашите деца, за доброто на децата на нашите деца, навистина треба да се трудиме да поминуваме повеќе време гледајќи напред отколку назад. Затоа имаме очи во предниот дел од нашите глави, а не во задниот“,
рече тој.
Хил изјави дека во Србија му се допаѓаат многу работи и дека тој и неговата сопруга Џули „уживаат многу“.
„Имаме многу пријатели. Уживаме во атмосферата во Србија. Единственото нешто во кое не уживаме е кога луѓето се песимисти. Мислам дека има многу причини за оптимизам. Живеев во различни делови на светот. Мислам дека во оваа земја има многу работи на кои треба да се биде благодарен и оптимист“,
порачува Хил.