Хамас ослободи 105 заложници за време на еднонеделниот прекин на огнот на крајот на ноември минатата година. За возврат, Израел ослободи 240 палестински затвореници од своите затвори
Палестинската милитантна група Хамас покажа отвореност за преговори за ослободување на некои израелски заложници, јавуваат медиумите.
Хамас им порача на посредниците дека е подготвен да разговара за ослободување жени, цивили и деца во замена за подолг прекин на огнот, објави денеска „Волстрит џурнал“ цитирајќи египетски официјални претставници.
Хамас ослободи 105 заложници за време на еднонеделниот прекин на огнот на крајот на ноември минатата година. За возврат, Израел ослободи 240 палестински затвореници од своите затвори. Хамас претходно го поврза натамошното ослободување на заложниците со крајот на војната. Според израелски владини извори, Хамас сè уште држи околу 130 лица кои ги киднапира од Израел во Газа на 7 октомври.
Според „Волстрит џурнал“, меѓу нив има и израелски војници. Израелската влада претпоставува дека 105 заложници сè уште се живи и дека Хамас држи многу од нив во својата мрежа на подземни тунели.
Според американскиот портал „Аксиос“, Израел наводно предложил двомесечен прекин на огнот во замена за ослободување на сите заложници. Понудата, наводно, била претставена на посредници од Египет и Катар, кои во моментов се обидуваат да ги усогласат различните барања.
Иако последните случувања се позитивни, тоа не значи дека договорот е неизбежен, пишува „Волстрит џурнал“. Според египетските власти, разговорите сепак би можеле да пропаднат.