Генералниот секретар на Обединетите нации Антонио Гутереш денеска повика на глобално примирје за да може светот да се фокусира на борбата против пандемијата на новиот коронавирус.
„Време е да се стави крај на вооружените конфликти и заедно да се фокусираме на вистинската борба за нашите животи“,
рече Гутереш во видео обраќање.
Тој истакна дека вирусот не бира националност или етничка припадност, фракција или религија.
„Тој ги напаѓа сите немилосрдно. Во меѓувреме, вооружените конфликти беснеат низ целиот свет. Најранливите а тоа се жените и децата, лицата со посебни потреби, маргинализираните и раселените, ја плаќаат највисоката цена. Тие се со најголем ризик“,
заклучи Гутереш.
Во исто време, генералниот секретар на Обединетите нации предупреди дека здравствените системи во земјите погодени од војни се распаднати и во нив останале само малкумина здравствени работници.
„Ставете крај на болеста на војната и борете се против болеста што го пустоши нашиот свет. Сè започнува со запирање на борбите насекаде. Сега. Тоа му е потребно на нашето човечко семејство, сега повеќе од кога било“,
рече Гутереш.