ДПС го утврди кандидатот два дена пред истекот на рокот за поднесување кандидатури до Државната изборна комисија (ДИК), откако останатите партии ги предложија своите кандидати
Претседателот на Демократската партија на социјалистите на Црна Гора (ДПС), Мило Ѓукановиќ, ќе биде кандидат на партијата на претстојните претседателски избори закажани за 19 март, објавија денеска подгоричките медиуми.
Главниот комитет на ДПС денеска едногласно го прифати предлогот на претседателството на таа партија да го избере Ѓукановиќ за претседателски кандидат.
ДПС го утврди кандидатот два дена пред истекот на рокот за поднесување кандидатури до Државната изборна комисија (ДИК), откако останатите партии ги предложија своите кандидати.
Ѓукановиќ беше претседател во два мандати, а седум пати беше избран за премиер. Три пати се пензионирал од државните обврски и се враќал.
Претседателските избори во Црна Гора се закажани за 19 март, а рокот за поднесување кандидатури истекува во недела на 26 февруари.
Државната изборна комисија досега ја прифати кандидатурата на лидерот на Демократскиот фронт (ДФ), Андрија Мандиќ, и функционерот на Социјалдемократската партија (СДП), Драгиња Вуксановиќ Станковиќ.
Кандидатури за претседател на државата најавија лидерот на демократите и поранешен претседател на Парламентот на Црна Гора, Алекса Бечиќ, и заменик-претседателот на движењето „Европа сега“, Јаков Милатовиќ.
Претходно, ДИК ја отфрли кандидатурата на лидерот на Движењето „Европа сега“, поранешниот министер за финансии Милојко Спајиќ, откако јавно беше објавено дека тој незаконски има српско државјанство и престој во таа држава.
Предизборните анкети што ги објавија медиумите покажуваат дека Црна Гора нема да добие претседател во првиот круг.
Претседателката на Парламентот на Црна Гора, Данијела Ѓуровиќ, ги распиша претседателските избори за 19 март. Актуелниот мандат на претседателот на Црна Гора, Мило Ѓукановиќ, започна на 20 мај 2018 година, кога тој положи заклетва пред пратениците во Собранието на Црна Гора.