Првиот вицепремиер и министер за политички систем и односи меѓу заедниците, Артан Груби на средба со евроамбасадорот Дејвид Гир разговарал за процесот на интеграција на земјата во ЕУ по отворањето на преговорите за членство, како и за итната потреба од иницирање уставни измени и нивно успешно завршување.
Груби го информирал амбасадорот Гир дека коалициските партнери веќе ги започнале подготовките за уставните измени и се решени да создадат Алијанса за Европа со сите прогресивни сили во земјата, соопштија од кабинетот на вицепремиерот.
Груби рече и дека сите државни институции даваат се од себе за успешно да заврши скрининг-процесот, кој започна во септември минатата година, додека му се заблагодари на амбасадорот Гир за континуираната поддршка во текот на овој значаен процес за државата.
На средбата биле разменети мислења и за предизвиците со кои ќе се соочи земјата во процесот на интеграција во ЕУ, особено реформите и владеењето на правото, борбата против корупцијата и организираниот криминал, како и за очекувањата, но и за конкретните придобивки што ќе ги имаат граѓаните по полноправното членство во Европската Унија.