За непочитување на министерската одлука е предвидена казна од 150 евра
За вработените и потрошувачите во супермаркетите во Грција, од денеска е задолжително носењето маска, а во спротивно, предвидена казна од 150 евра, јави МИА од Атина.
Во Грција, првпат се воведува оваа мерка, со оглед на тоа што во првата фаза од укинувањето на рестрикциите и карантинот на почетокот на мај, во упермаркетите заштитните маски беа задолжителни само за вработените што работат со прехранбени продукти кои не се спакувани, а не и за клиентите.
Министерот за развој и инвестиции на Грција Никос Папатанасис, говорејќи за телевизијата „Скај“ рече дека не е тешко да се спроведе мерката и упати апел до супермаркетите да имаат на располагање маски, во случај некој од муштериите да нема.
Министерската одлука, објавена синоќа во „Службен весник“ на Грција е во сила до 26 јули.