Грција ја разгледува можноста за воведување рестриктивни мерки во општините каде што има раст на бројот на заболени од ковид-19, јави дописничката на МИА од Атина.
„Комисијата на епидемиолози ја разгледува можноста, доколку е потребно, да се преземат мерки на локално ниво, на ниво на општини во областа Атика“,
рече министерот за здравство на Грција, Василис Кикиљас, во интервјуто за грчката телевизија „Опен“.
Кикиљас објасни дека половина од новите случаи речиси секојдневно се во Атика, поширокиот регион на Атина, а со оглед на тоа дека има пет милиони жители, рече дека очигледно е дека не може да се преземат мерки за целата периферија, туку ќе бидат на локално ниво, на ниво на општини.
Портпаролот на грчката влада, Стелиос Пецас, на денешниот редовен брифинг со новинарите истакна дека премиерот Киријакос Мицотакис дал наредба до надлежната комисијата на експерти од Министерството за здравство на Грција да разгледаат и достават листа мерки што би можеле да се преземат или на локално или на општо ниво, доколку е потребно, а конкретната листа ќе биде подготвена денеска или утре.
„Ги слушаме и им веруваме на експертите и подготвени сме да преземеме каква било мерка, ако е потребно, за да се задржи добрата епидемиолошка слика на земјата, што е стабилна од почетокот на епидемијата“,
рече Пецас.
Во Грција, од почетокот на епидемијата, регистрирани се вкупно 13 240 случаи на ковид-19, а починаа 305 лица.