Штом се осигуриме дека постои можност, веднаш ќе ги поддржиме со вакцини нашите соседни земји, рече грчкиот премиер Киријакос Мицотакис од Брисел, веднаш по Европскиот совет за време на брифингот со грчките новинари, јави дописничката на МИА од Атина.
Во однос на тоа како Грција може да учествува и да го помогне системот Ковакс, Мицотакис објасни дека едниот начин е билатерално да се помогнат соседите, а другиот преку директен придонес во вакцините што ќе ги собира Европа.
„Имаме различни начини да придонесеме. Прво, можеме да придонесеме на билатерално ниво и во овој момент разгледуваме непосредно прво билатерално зајакнување на нашите соседи. Потоа, имаме можност да учествуваме или директно во Ковакс или евентуално преку европската иницијатива, односно и ние да влеземе во 100-те милиони вакцини што Европа сака да ги собере. Ова ќе биде начинот, но многу веројатно е дека ќе излеземе со некои соопштенија за директна поддршка на нашите соседни земји, штом се осигураме дека ја имаме оваа можност, веднаш ќе го сториме тоа“,
објасни Мицотакис.
Оцени дека е позитивно тоа што некои од вакцините веќе се одобруваат и за помлада возраст, што според Мицотакис дава можност да се отвори дискусија и да се разгледа можноста за вакцинација на деца над 12 години.
Паралелно, говорејќи со грчките новинари, го изрази своето задоволство за европскиот сертификат за вакцинација, усвоен по предлог на Грција.