По изјавата на министерот за надворешни работи, Бујар Османи, дека ние сме барале соработката со САД да ја издигнеме на повисоко ниво, по што американски тим за санкции пристигна во земјава за да истражува наводи за корупција кај поранешни и сегашни државни функционери, Грковска изјави дека одлука за повикување на американскиот тим немало во владата
Вицепремиерката за добро владеење Славица Грковска во емисијата 24 анализа рече дека доколку имало добри резултати, немало да се оформи Специјалното јавно обвинителство кое пропадна на разочарување на народот кој сметал дека ќе донесе правда.
По изјавата на министерот за надворешни работи, Бујар Османи, дека ние сме барале соработката со САД да ја издигнеме на повисоко ниво, по што американски тим за санкции пристигна во земјава за да истражува наводи за корупција кај поранешни и сегашни државни функционери, Грковска изјави дека одлука за повикување на американскиот тим немало во владата.
„Очекувавме дека ќе има поенергична иницијатива како поука на се што се случувало дотогаш. Јас не работев со американскиот тим. Одлука за повикување на тимот немало во владата. Османи веројатно зборува за активности во доменот на надворешната политика и е најповикан за тоа. Ние во кабинетот постојано имаме актиности кои се врзани во делот на детектирање на системските слабости и како да се надминат“,
рече Грковска.
Шефот на дипломатијата Бујар Османи во коментар за тоа за што станува збор со доаѓањето на тимот за санкции од Вашингтон, рече дека ние сме барале соработката со САД да ја издигнеме на повисоко ниво.
Според неговата изјава, тоа било побарано кога имало стравувања дека ќе останеме без мониторинг од ЕУ ако не ги отвориме пристапните преговори.
„Апсолутно го поздравуваме овој засилен ангажман на САД во поддршка на институциите за владеење на правото. Веднаш штом го започнавме стратешкиот дијалог со САД во јуни, САД прво финансиски помагаше, додаде над 4 милиони евра само за прашањето на владеење на правото, еве сега продолжува со дополнителни механизми преку поддршка од страна на експрерти, искористување на нивните механизми, санкционирање, јавно именување итн. И тоа е дел од тоа што ние го побаравме, кога имавме дилеми дали ќе почнат преговорите или не, јас стравував дека ќе останеме без таков мониторинг. Тогаш побаравме од САД дајте да ја издигнеме на повисоко ниво оваа соработка. Беше наше барање“,
рече Османи.