Во изјава за медиумите, вицепремиерката кажа дека досега не ја добила претставката, но штом ќе ја добие по неа ќе биде постапено непристрасно и врз основа на аргументи
На последната одржана седница на Антикорупциската комисија на 5 мај, претседателката Билјана Ивановска кажа дека до нив се доставени докази оти првиот вицепремиер и министер за политички систем и односи меѓу заедниците Артан Груби ги користел службените простории на ова министерство за партиски цели
Вицепремиерката задолжена за политики за добро владеење Славица Грковска сè уште не ја добила претставката од Државната комисија за спречување на корупцијата (ДКСК) во врска со доказите кои антикорупционерите кажаа дека ги поседуваат оти првиот вицепремиерот Артан Груби ги користел службените простории на Министерството за политички систем и односи меѓу заедниците за партиски цели.
Во изјава за медиумите, Грковска денеска кажа дека досега не ја добила претставката, но штом ја добие по неа ќе биде постапено непристрасно и врз основа на аргументи.
„Сè уште не сум ја добила претставката. Штом ќе ја добиеме ќе постапиме исто како и по сите претставки досега, ќе одлучиме врз основа на аргументите. Знаете дека досега сме постапувале непристрасно, без разлика за кого станува збор“,
рече Грковска.
Вицепремиерката додаде дека кај дел од функционерите има промена во начинот на однесување во поглед на зголемување на свесноста, а дека со мерките што се преземаат ќе се дојде до момент кога некој ќе понесе одговорност за своето работење.
На последната одржана седница на Антикорупциската комисија на 5 мај, претседателката Билјана Ивановска кажа дека до нив се доставени докази оти првиот вицепремиер и министер за политички систем и односи меѓу заедниците Артан Груби ги користел службените простории на ова Министерство за партиски цели.
До ДКСК, како што кажа тогаш Ивановска, стигнале фотографии и линкови од фејсбук-профилот на Демократската унија за интеграција (ДУИ) од кои се гледа дека во Министерството се одржувале средби на нивниот партиски лидер со претставници од странство.