„По инструкции од Министерството за надворешни работи на Грција, амбасадорката Софија Филипиду ја напушти салата“, велат за „360 степени“ од Амбасадата на Грција во земјава
Грчката амбасадорка Софија Филипиду, која заедно со колегите амбасадори дојде да ја проследи седницата на Собранието за инаугурација на Гордана Силјановска-Давкова за претседателка на државата, ја напушти пленарната сала. Заминувањето е во знак на протест поради тоа што Силјановска-Давкова, при давањето свечена заклетва, не го употреби уставното име на земјава – Република Северна Македонија, туку користеше ‘Македонија’.
Веста прв на Икс ја објави пратеникот на ВМРО-ДПМНЕ, Антонијо Милошоски.
? Грчката амбасадорка Филипиду ?? демонстративно ја напушти собраниската ложа, заради употребата на терминот Македонија при положувањето на заклетвата од новата Претседателката Силјаноска Давкова @gogamkd ?? pic.twitter.com/iRlNqYbWCh
— Antonio Macedonian (@AMiloshoski) May 12, 2024
За потегот на Филипиду, „360 степени“ доби потврда и од Амбасадата на Грција во земјава.
„По инструкции од Министерството за надворешни работи на Грција, амбасадорката Софија Филипиду ја напушти салата“,
велат од грчката амбасада.
Силјановска-Давкова во изборната програма и во предизборните настапи наведуваше дека при обраќањата и именувањето на државата, нема да ја користи придавката ‘северна’.
Грчкиот премиер Кирјакос Мицотакис во интервју за телевизијата Алфа рече дека иако тој лично претходно не се согласувал со Преспанскиот договор, особено со деловите „македонска нација“ и „македонски јазик“, сепак го прифатил во рамки на континуитетот на државата. Затоа тој се надева дека и новото раководство на нашата земја ќе се држи до одредбите на овој меѓународен договор.
„Да бидеме трпеливи. Сакам да се надевам дека оние работи што се слушнаа предизборно, нема да бидат официјална позиција на новата влада постизборно, бидејќи ако се случи ова, ќе имаме проблеми“,
рече Мицотакис.
Тој кажа дека изјавите на функционерите на ВМРО-ДПМНЕ ги следел со загриженост, но и дека „со голем интерес“ го чека официјалниот став на новиот премиер за да види на кој начин ќе се осврне на името на својата земја.